مکہ دفاعی معاہدے کے اعلیٰ حکام تہران میں اکٹھے، عاصم منیر، سعودی وزیر دفاع اور ترک انٹیلی جنس سربراہ کی ایرانی قیادت سے ملاقات

تہران (ڈیلی اردو) پاکستان، سعودی عرب اور ترکیہ کے اعلیٰ حکام نے ایران کے دارالحکومت تہران میں علاقائی سلامتی اور بڑھتی ہوئی کشیدگی پر ایرانی قیادت سے اہم ملاقات کی۔ پاکستانی وفد کی نمائندگی چیف آف ڈیفنس فورسز فیلڈ مارشل عاصم منیر کر رہے ہیں، جبکہ سعودی عرب کے وزیر دفاع شہزادہ خالد بن سلمان اور ترکیہ کے انٹیلی جنس ادارے کے سربراہ ابراہیم قالن بھی اجلاس میں شریک ہیں۔

خبر رساں ادارے رائٹرز کے مطابق سعودی عرب پر ایران نواز حوثی باغیوں کے حملوں میں اضافے اور ایران، امریکا و اسرائیل کے درمیان کشیدگی کے پس منظر میں یہ ملاقات غیر معمولی اہمیت رکھتی ہے۔ اس کا مقصد علاقائی سلامتی، دفاعی تعاون اور جاری بحران کے سفارتی حل کے لیے رابطوں کو فروغ دینا ہے۔

سعودی وزارت خارجہ کے مطابق مکہ مشترکہ دفاعی معاہدے میں شامل ممالک کے نمائندوں کا دورۂ تہران خطے میں کشیدگی کم کرنے، مذاکرات کی حوصلہ افزائی اور سفارتی حل کی حمایت کی کوششوں کا حصہ ہے۔ سعودی حکام نے پاکستان اور قطر کی ثالثی کی کوششوں کی حمایت کا بھی اعادہ کیا ہے۔

ایرانی سپریم نیشنل سکیورٹی کونسل کے نائب سیکریٹری علی باقری کنی کے مطابق سعودی وزیر دفاع، فیلڈ مارشل عاصم منیر اور ترک انٹیلی جنس سربراہ ایرانی حکام کے ساتھ علاقائی سلامتی پر مشاورت کر رہے ہیں۔ ایرانی حکام کا مؤقف ہے کہ خطے کا امن برقرار رکھنے کے لیے علاقائی ممالک کو مشترکہ طور پر اقدامات کرنے چاہییں۔

ایرانی وزارت خارجہ کے ترجمان اسماعیل بقائی کے مطابق بات چیت میں اسرائیل کی پالیسیوں، فلسطینی علاقوں اور لبنان کی صورت حال اور ایران پر امریکی و اسرائیلی فوجی کارروائیوں کے علاقائی اثرات بھی زیر بحث ہیں۔ اجلاس کے حتمی فیصلوں اور کسی مشترکہ عملی لائحۂ عمل کی تفصیلات سامنے آنا باقی ہیں۔

واضح رہے کہ پاکستان، سعودی عرب اور ترکیہ نے رواں سال اگست میں مکہ مکرمہ میں مشترکہ دفاعی معاہدے پر دستخط کیے تھے، جس کے تحت ایک رکن ملک پر مسلح حملے کو تمام رکن ممالک پر حملہ تصور کرنے کی شق شامل ہے۔ رائٹرز کے مطابق سعودی عرب اور پاکستان اس معاہدے کی منظوری دے چکے ہیں، جبکہ ترکیہ میں اس کی توثیق کا عمل جاری ہے۔