نیازی حکومت بھگوڑے کو بچانے کی کوشش کررہی ہے: بلاول بھٹو زرداری

اسلام آباد (ڈیلی اردو/این این آئی) پاکستان پیپلز پارٹی کے چیئرمین بلاول بھٹو زر داری نے کہا ہے کہ آصف زرداری اپنے نظریات پر قائم ہیں، جھکنے کیلئے تیار نہیں۔

بلاول بھٹو زرداری نے اپنے والد آصف زرداری سے ملاقات کی جو تین گھنٹے جاری رہی جس میں مختلف امور زیر غور آئے۔

بلاول بھٹو زرداری نے آصف زرداری سے ملاقات کے بعد میڈیا سے بات چیت کرتے ہوئے کہا کہ آج بھی آصف زرداری اپنے نظریات پر قائم ہیں ،آصف زرداری جھکنے کے لئے تیار نہیں۔

انہوں نے کہاکہ سپریم کورٹ اب فیصلہ کرے گی کہ سندھ کے کیسز پنڈی میں چلائے جائیں یا نہیں۔ انہوں نے کہا کہ اس بار انصاف ہوگا، پاکستان کی عدلیہ کو پورا پاکستان دیکھ رہا ہے، عمران نیازی کی حکومت بھگوڑے کو بچانے کی کوشش کررہی ہے۔

انہوں نے کہا کہ چیف جسٹس نے جو بات کی تھی امید ہے ایک آمر کے خلاف فیصلہ آ جائے گا۔ انہوں نے کہا کہ آج منگل کو اے پی سی اسلام آباد میں ہوگی جس میں تفصیل سے بات ہوگی، مولانا فضل الرحمن نے مارچ میں انتخابات کے حوالے سے ہم سے بات نہیں کی۔

انہوں نے کہاکہ عمران خان اپنی سیاست کو بچانے کے لئے میاں نوازشریف کو باہر بھیجا، عمران خان ہر بات پر یوٹرن لیتا ہے۔