نیب کے زیر حراست کے ڈی اے کا ایڈیشنل ڈائریکٹر محمد ناصر کا دورانِِ علاج انتقال

کراچی (ویب ڈیسک) قومی احتساب بیورو (نیب) کے زیر تفتیش اور سینٹرل جیل میں زیرحراست کراچی ڈیولپمنٹ اتھارٹی (کے ڈی اے) کے عہدیدار گردے کی تکلیف میں مبتلا ہو کر دوران علاج دم توڑ گئے۔

کے ڈی اے کے ایڈیشنل ڈائریکٹر محمد ناصر کو جیل میں طبیعت بگڑنے پر 28 مارچ کو ڈاکٹر رتھ پاؤ سول ہسپتال کراچی میں منتقل کیا گیا تھا۔ 58 سالہ محمد ناصر گردے کی تکلیف میں مبتلا تھے۔

واضح رہے کہ نیب نے متوفی کو 5 برس قبل سرکاری زمین کی غیر قانونی طور پر فروخت کے الزام میں گرفتار کیا تھا۔

دوسری جانب پولیس سرجن ڈاکٹر قرار احمد عباسی نے بتایا کہ متعلقہ مجسٹریٹ ہسپتال پہنچے اور قانونی تقاضے پورے کیے۔

اس ضمن میں بتایا گیا کہ ’اہلخانہ نے متوفی کا پوسٹ مارٹم کرانے کی اجازت نہیں دی‘۔

نیب نے کے ڈی اے کے ایڈیشنل ڈائریکٹر کو 2015 میں حراست میں لیا اور ان کے خلاف کے زمینوں کی غیرقانونی فروخت کے الزام میں 3 ریفرنس دائرے کیے تھے۔

متوفی محمد ناصر کو 11 دسمبر 2015 کو ریمانڈ پر سینٹرل جیل کراچی منتقل کردیا گیا تھا۔

خیال رہے کہ اس سے قبل ‘کے ڈی اے’ کے عہدیدار قوی خان بھی دوران علاج ہسپتال میں دم توڑ چکے ہیں۔

دونوں کے ڈی اے افسران گلستان جوہر اسکیم 36 کے بلاک ون میں واقع ’یونیورسٹی یل ویلاز‘ کی اراضی بچنے اور غیرقانونی تعمیرات کے مقدمے میں نامزد تھے۔

دونوں پر ‘کے الیکڑک’ کی ہائی ٹرانسمیشن اور برساتی نلے کے لیے مخصوص اراضی بھی غیر قانونی طور پر فروخت کرنے کا الزام تھا۔