ٹانک، ڈی آئی خان روڈ 12 گھنٹے بند رہے گی، مختلف علاقوں میں دفعہ 144 نافذ

ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع ڈیرہ اسماعیل خان کی ضلعی انتظامیہ نے سیکیورٹی انتظامات کے پیش نظر ٹانک، ڈی آئی خان روڈ سمیت مختلف علاقوں میں 22 اگست کو عارضی طور پر آمدورفت پر پابندی عائد کردی ہے۔

انتظامیہ کے مطابق صبح 6 بجے سے شام 6 بجے تک ٹانک، ڈی آئی خان روڈ پر ہر قسم کی ٹریفک کی آمدورفت بند رہے گی۔ پابندی کا اطلاق مسافر گاڑیوں، کارگو ٹرانسپورٹ اور موٹر سائیکلوں پر بھی ہوگا۔

حکام کے مطابق طارق شہید چوک سے بھگوال تک ٹانک روڈ اور اقبال فورٹ سے بھگوال تک سڑک پر آمدورفت معطل رہے گی۔ اس کے علاوہ کلاچی، ہتھالہ، کوٹ عیسیٰ اور گڑھ عبداللہ کے علاقوں میں بھی پابندیاں نافذ رہیں گی۔

انتظامیہ نے پوٹہ ہتھالہ بازار کو بھی 22 اگست کو صبح 6 بجے سے شام 6 بجے تک بند رکھنے کا فیصلہ کیا ہے۔

ضلعی انتظامیہ نے شہریوں سے اپیل کی ہے کہ پابندی کے اوقات میں غیر ضروری سفر سے گریز کریں اور اپنے ضروری سفری امور پہلے سے مکمل کرلیں۔ ایمرجنسی سروسز اور قانون نافذ کرنے والے ادارے اس پابندی سے مستثنیٰ ہوں گے۔