ٹانک: سابق آئی جی خیبرپختونخوا پولیس کے بھائی ملک حبیب محسود کا جنازہ سخت سیکیورٹی میں ادا

ٹانک (مانیٹرنگ ڈیسک) قبائلی ملک و سابقہ یونین کونسل ناظم ملک حبیب محسود کی نماز جنازہ ٹانک کے علاقے گرہ پتھر میں ادا کردی گئی، انہیں گزشتہ روز قتل کیا گیا تھا۔

فائرنگ سے ہلاک ہونے والے سابق آئی جی خیبرپختونخوا پولیس صلاح الدین محسود کے بھائی ملک حبیب کا جنازہ سخت سیکیورٹی میں ادا کیا گیا۔

جنازے میں سول وعسکری حکام اور قبائلی عمائدین نے شریک تھی۔ پولیس ڈی پی او وقار احمد کے مطابق قاتلوں کی گرفتاری کے لئے پولیس کا آپریشن تاحال جاری ہے۔

گزشتہ روز اغواء کار نامعلوم ملزمان نے سابق آئی جی صلاح الدین محسود کے بھائی حبیب محسود کو منزئی کے علاقے میں گولی مار کر ہلاک کردیا تھا اور فائرنگ کے تبادلے میں مقتول کا گن مین بھی ہلاک ہوگیا تھا۔

صوبہ خیبر پختونخوا کے ضلع ٹانک میں نامعلوم ملزمان نے سابق آئی جی پی پولیس صلاح الدین محسود کے بھائی اغوا کے بعد قتل کردیا۔

ڈی پی او پولیس ٹانک وقار احمد کے مطابق سابق آئی جی کے بھائی حبیب محسود پر گرہ پتھر کے علاقے میں موٹر سائیکل سواروں نے فائرنگ کی، جس کے نتیجے میں حبیب محسود کا گن مین زخمی ہوگیا، اور اغوا کار حبیب محسود کو اغوا کرکے ساتھ لے گئے۔

پولیس ٹیم حبیب محسود کی لاش کے پاس

ڈی پی او نے بتایا کہ واقعے کی اطلاع ملتے ہی پولیس نے فوری کارروائی کی اور ایک مقام پر اغواء کاروں کا پولیس سے سامنا ہوا اور تعاقب پر اغواء کاروں نے پولیس ٹیم پر فائرنگ کی جس میں گاڑی کو نقصان پہنچا۔

ڈی پی او کے مطابق اغواء کار حبیب محسود کو ٹانک سے 14 کلومیٹر دور منزئی کے علاقے میں لے گئے، اور قتل کردیا، جب کہ اغواء کاروں کی فائرنگ سے زخمی ہونے والا گن مین بھی زخموں کی تاب نہ لاتے ہوئے دم توڑ گیا تھا۔

پولیس کی بھاری نفری نے علاقے کو گھیرے میں لے کر سرچ آپریشن شروع کردیا ہے۔