ٹانک میں سکیورٹی فورسز کا آپریشن، ’فتنہ الخوارج‘ کے 4 دہشت گرد ہلاک، آئی ایس پی آر

راولپنڈی (ڈیلی اردو) سکیورٹی فورسز نے صوبہ خیبر پختون خوا کے ضلع ٹانک میں دہشتگردوں کی موجودگی کی اطلاع پر آپریشن کیا اور فائرنگ کے تبادلے میں ’فتنہ الخوارج‘ کے چار دہشت گردوں کو ہلاک کردیا۔

پاکستانی فوج کے شعبہ تعلقات عامہ (آئی ایس پی آر) کے مطابق 27 جولائی 2024 بروز ہفتہ سکیورٹی فورسز نے دہشت گردوں کی موجودگی کی اطلاع پر ضلع ٹانک میں انٹیلی جنس کی بنیاد پر مشترکہ آپریشن کیا۔

آئی ایس پی آر کا کہنا ہے کہ ’آپریشن کے دوران شدید فائرنگ کے تبادلے کے بعد ”فتنہ الخوارج“ کے چار خارجی دہشت گردوں کو ہلاک کردیا گیا‘۔

مارے گئے دہشت گردوں سے اسلحہ اور گولہ بارود بھی برآمد ہوا۔

آئی ایس پی آر کے مطابق ہلاک دہشتگرد سکیورٹی فورسز کے خلاف دہشت گردی کی متعدد کارروائیوں کے ساتھ ساتھ معصوم شہریوں کے اغوا اور ٹارگٹ کلنگ میں بھی سرگرم رہے ہیں۔

ترجمان پاک فوج کا کہنا ہے کہ علاقے میں پائے جانے والے مزید دہشت گردوں کو ختم کرنے کے لیے سینی ٹائزیشن آپریشن کیا جا رہا ہے، پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔