پاکستان بحریہ کا بحیرۂ عرب میں جدید میزائل اور بغیر پائلٹ نظام کا کامیاب تجربہ

راولپنڈی (ک م) پاکستانی فوج کے شعبۂ تعلقاتِ عامہ (آئی ایس پی آر) کے مطابق پاکستان بحریہ نے شمالی بحیرۂ عرب میں ایک جامع بحری مشق کے دوران زمین سے فضا تک مار کرنے والے میزائل کا کامیاب تجربہ کیا ہے۔

آئی ایس پی آر کا کہنا ہے کہ ورٹیکل لانچنگ سسٹم سے داغا گیا ایل وائی-80 (این) میزائل توسیعی رینج پر اپنے ہدف کو کامیابی سے نشانہ بنا کر تباہ کرنے میں کامیاب رہا، جس سے پاکستان بحریہ کے جدید فضائی دفاعی نظام کی مؤثر اور طویل فاصلے تک مار کرنے کی صلاحیتوں کی تصدیق ہوئی۔

بیان میں کہا گیا ہے کہ مشق کے دوران پاکستان بحریہ نے اپنی آپریشنل تیاری اور جنگی صلاحیتوں کا عملی مظاہرہ کیا، جس میں بدلتی ہوئی بحری جنگ کے تقاضوں کے مطابق روایتی اور بغیر پائلٹ نظاموں کی صلاحیتیں نمایاں رہیں۔

آئی ایس پی آر کے مطابق مشق میں لوئٹرنگ میونیشن (ایل ایم) کے ذریعے سطحی اہداف کو کامیابی سے نشانہ بنانے کا مظاہرہ بھی شامل تھا، جس سے پاکستان بحریہ کی درست اور مؤثر اسٹرائیک صلاحیت اجاگر ہوئی۔ بیان کے مطابق لوئٹرنگ میونیشن نے سطحی اہداف کو مؤثر انداز میں تباہ کیا، جو جدید بحری جنگ میں اس ٹیکنالوجی کی افادیت کو ظاہر کرتا ہے۔

اس کے علاوہ بغیر پائلٹ بحری جہاز (یو ایس وی) کے کھلے سمندر میں کامیاب آزمائشی تجربات بھی کیے گئے، جو خودکار بحری ٹیکنالوجی میں ایک اہم پیش رفت قرار دیے گئے ہیں۔ آئی ایس پی آر کا کہنا ہے کہ ان آزمائشوں کے دوران پلیٹ فارم کی تیز رفتاری، مشن کے دوران پائیداری، غیر معمولی چابک دستی، درست نیویگیشن اور خراب موسمی حالات میں مؤثر کارکردگی کی صلاحیتوں کی توثیق کی گئی۔

بیان کے مطابق یو ایس وی کم خطرے اور زیادہ اثر رکھنے والا ایک مؤثر نظام ہے جو سٹیلتھ خصوصیات کے ساتھ ایک ٹیکٹیکل انٹرسیپٹر کے طور پر کام کرنے کی صلاحیت رکھتا ہے۔