پاکستان نے افغانستان سے راکٹ حملے کے بعد طور خم بارڈر بند کردیا

اسلام آباد (ڈیلی اردو) افغانستان کے نامعلوم مقام سے فائر ہونے والا مارٹر گولہ طورخم سرحد کے قریب سکیورٹی چیک پوسٹ کے قریب گرا ہے جس کے پِھٹنے سے کسی قسم کا جانی نقصان نہیں ہوا ہے لیکن پاکستان نے فوری طور پر طورخم بارڈر کو ہرقسم کی آمد و رفت کے لئے بند کردیا ہے۔

سکیورٹی ذرائع کے مطابق مارٹر گولے آج علی الصبح اقبال ایف سی پوسٹ کے قریب ایک نالے میں گر کر پھٹ گئے ہیں۔

پاکستان کے ترجمان دفترخارجہ نے کہا کہ سرحد پار سے 2 راکٹ پاکستانی علاقے میں پھینکے گئے، راکٹ حملے میں کوئی جانی نقصان نہیں ہوا تاہم سیکیورٹی خدشات کے تحت طور خم بارڈر بند کردیے گئے ہیں۔

ترجمان دفترخارجہ نے مزید بتایا کہ پاکستان نے راکٹ حملوں کا معاملہ افغان حکام کے ساتھ اٹھایا ہے، طور خم بارڈر پر آمدو رفت معطل گیٹ سیکیورٹی وجوہات کے لیے بند کردیے گئے، طورخم گیٹ کی بندش عارضی ہے، جلد کھول دیا جائے گا۔

دوسری طرف بارڈر بند ہونے کی وجہ سے سرحد کے دونوں جانب نہ صرف مال بردار گاڈیوں کی قطاریں لگ گئی ہے بلکہ آنے جانے والے لوگوں کو بھی سخت مشکلات کا سامنا ہے۔