پشاور پولیس نے تخریب کاری کا منصوبہ ناکام بنا دیا

پشاور (ڈیلی اردو) خیبرپختونخوا پولیس نے اہم کارروائی کرتے ہوئے صوبے کو دہشت گردی کے بڑے منصوبے سے بچا لیا۔

تفصیلات کے مطابق صوبائی دارالحکومت پشاور میں پولیس نے تخریب کاری کا بڑا منصوبہ ناکام بنایا۔

ایس پی ورسک ارشد خان کے مطابق پشاور پولیس نے بروقت کارروائی سے تباہی کا منصوبہ ناکام بنا دیا، اور متھرا کے علاقے سے راکٹ پروپیلڈ گرینیڈ اور آر پی جی برآمد کرلئے۔

ایس پی ورسک نے بتایا کہ پولیس نے خفیہ اطلاع پر متھرا کے علاقے میں واقع کھیتوں میں چھپائے گئے 10 راکٹ گولے اور 10 آر پی جی برآمد کئے، جو ممکنہ طور پر پولیس اور سیکیورٹی فورسز کو نشانہ بنانے کے لئے استعمال کیا جانا تھا۔

ایس پی ارشد خان نے مزید بتایا کہ پولیس نے اسلحہ تحویل میں لے کربی ڈی یو کو طلب کرلیا، جب کہ اس حوالے سے مزید تحقیقات جاری ہیں۔