پنجاب سے کالعدم تحریک طالبان پاکستان اور القاعدہ کے 7 دہشت گرد گرفتار

لاہور (بیورو رپورٹ) صوبہ پنجاب کے مختلف اضلاع سے انٹیلی جنس بیسڈ آپریشنز میں کالعدم تنظمیوں کے 7 دہشت گرد گرفتار کر لیے گئے۔

ترجمان کاؤنٹر ٹیررازم ڈیپارٹمنٹ (سی ٹی ڈی) پنجاب کے مطابق ساہیوال، بہاول پور اور گوجرانوالہ میں انٹیلی جنس بیسڈ آپریشن کیے گئے۔

ترجمان سی ٹی ڈی کے مطابق دہشت گردوں کا تعلق کالعدم القاعدہ اور کالعدم تحریک طالبان پاکستان (ٹی ٹی پی) سے ہے۔

حکام کے مطابق گرفتار دہشت گردوں کی شناخت ابرار الحق، عبدالرحمٰن، عمیر، عمران، اشفاق، ایوب اور معاویہ کے نام سے ہوئی ہے، جن کے قبضے سے بارودی مواد، ڈیٹو نیٹر ، موبائل فون، اسلحہ، گولیاں اور نقدی برآمد ہوئی۔ دہشت گردوں کے خلاف مقدمات درج کرکے تفتیش شروع کردی گئی ہے۔

ترجمان سی ٹی ڈی کے مطابق رواں ہفتے139 کومبنگ آپریشنز کے دوران 18 مشتبہ افراد گرفتار کیے گئے، جن میں 8523 افراد سے پوچھ کچھ کی گئی۔ کاؤنٹر ٹیررازم ڈیپارٹمنٹ (سی ٹی ڈی) محفوظ پنجاب کے ہدف پر عمل پیرا اور دہشت گردی کے ناسور کو جڑ سے اکھاڑ پھینکنے کے لیے پُرعزم ہے۔