ڈنمارک دفاعی بجٹ میں 10 ارب کرون کا اضافہ، یوکرین کی مدد بھی شامل

کوپن ہیگن(ڈیلی اردو/ڈی پی اے)  ڈنمارک نے اعلان کیا ہے کہ وہ اپنے 2026 کے بجٹ میں 10 ارب کرون یعنی 1.6 ارب ڈالر کا اضافی فنڈ دفاع اور یوکرین کی عسکری مدد کے لیے رکھے گا۔ اس اضافے کے بعد ڈنمارک کا دفاعی خرچ اس کی مجموعی قومی پیداوار (GDP) کا تین فیصد ہو جائے گا۔

ڈنمارک کی حکومت کا ہدف ہے کہ وہ مستقبل میں اپنے دفاعی اخراجات کو جی ڈی پی کے پانچ فیصد تک لے جائے۔ ڈنمارک امریکی صدر ڈونلڈ ٹرمپ کی تجویز سے بھی کہیں آگے بڑھنے کی کوشش میں ہے اور نیٹو کی 2032 کی ٹائم لائن سے پہلے ہی اپنے اس ہدف کو حاصل کیا جا سکے۔

ڈنمارک کے وزیر دفاع ٹرولز لند پاؤلسن نے کہا، ’’جغرافیائی سیاسی صورتحال ہمیں دفاعی صلاحیت بڑھانے پر مجبور کر رہی ہے تو یہ خوش آئند ہے کہ ہم ایک بار پھر زیادہ رقم دفاع کے لیے مختص کر رہے ہیں۔‘‘

انہوں نے مزید کہا، ’’ہم یوکرین کی حمایت کر رہے ہیں کیوں کہ یہ فقط یوکرین کا نہیں پورے یورپ کی سلامتی کا معاملہ ہے۔‘‘