ڈی آئی خان میں سیکیورٹی فورسز کا آپریشن، ٹی ٹی پی کے 4 دہشتگرد ہلاک

ڈیرہ اسماعیل خان (ڈیلی اردو)خیبرپختونخواہ کے شورش زدہ ضلع ڈیرہ اسماعیل خان میں سیکیورٹی فورسز نے خفیہ اطلاع پر کارروائی کرتے ہوئے کالعدم تحریک طالبان پاکستان (ٹی ٹی پی) کے 4 دہشتگردوں کو ہلاک کردیا، جبکہ ایک دہشتگرد زخمی حالت میں فرار ہوگیا۔

سیکیورٹی ذرائع کے مطابق ٹی ٹی پی کے دہشتگردوں کا ایک گروپ کلاچی سے مڈی کی جانب سفر کر رہا تھا، جس کی اطلاع ملنے پر سیکیورٹی فورسز نے انٹیلی جنس کی بنیاد پر کارروائی کی اور دہشتگردوں کو راستے میں روک لیا۔

کارروائی کے دوران فائرنگ کا تبادلہ ہوا، جس میں ابتدائی طور پر 2 دہشتگرد ہلاک جبکہ 3 زخمی ہوگئے۔ زخمیوں میں شامل وحید خان اور عاطف اللہ بعد ازاں زخموں کی تاب نہ لاتے ہوئے دم توڑ گئے، جس کے بعد ہلاک ہونے والے دہشتگردوں کی مجموعی تعداد 4 ہوگئی۔

ذرائع کے مطابق ایک زخمی دہشتگرد موقع سے فرار ہونے میں کامیاب ہوگیا، جس کی تلاش کے لیے سیکیورٹی فورسز نے علاقے میں سرچ آپریشن شروع کردیا ہے۔ علاقے کو محفوظ بنانے کے لیے بھی اقدامات جاری ہیں۔