ڈی آئی خان : سی پیک موٹروے پر فائرنگ، موٹروے پولیس کے 2 اہلکار زخمی

ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع ڈیرہ اسماعیل خان کے علاقہ بنیالہ وانڈہ یارک کے قریب سی پیک موٹروے پر مسلح افراد نے موٹروے پولیس کی گاڑی کو فائرنگ کا نشانہ بنا دیا، جس کے نتیجے میں دو پولیس اہلکار زخمی ہوگئے۔

ذرائع کے مطابق فائرنگ کے واقعے میں حوالدار کفایت اللہ اور حوالدار عرفان زخمی ہوئے۔ دونوں زخمی اہلکاروں کو فوری طور پر طبی امداد کے لیے اسپتال منتقل کردیا گیا، جہاں ان کا علاج جاری ہے۔

واقعے کی اطلاع ملتے ہی سکیورٹی فورسز نے علاقے کو گھیرے میں لے کر سرچ آپریشن شروع کردیا۔ اہلکاروں کی جانب سے حملہ آوروں کی تلاش اور واقعے کے محرکات کا تعین کرنے کے لیے کارروائی جاری ہے۔