کراچی سے کالعدم تنظیم کا شدت پسند گرفتار، چار عدد دستی بم برآمد

کراچی (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) اور حساس ادارے نے مشترکہ کارروائی کے دوران کالعدم تنظیم جئے سندھ متحدہ محاذ (جسمم) سے تعلق رکھنے والے شدت پسند کو ماڑی پور روڈ سے گرفتار کرلیا۔ 

حکام کے مطابق خفیہ ذرائع سے ملنے والی اطلاع اور نشاندہی پر ماڑی پور روڈ ریلوے اسٹیشن کے قریب آگرہ تاج میں چھاپہ مارا گیا جہاں سے شدت پسند گورنر کولاچی کو گرفتار کر کے اسلحہ، 4 دستی بم اور گولیاں برآمد کرلیں۔

ترجمان سی ٹی ڈی کے مطابق گرفتار شدت پسند کا بھائی ذوالفقار کولاچی سال 2011 میں اپنے ساتھیوں کے ساتھ مل کر ابراہیم حیدری کے علاقے میں ایک گھر کے اندر بم بناتے ہوئے پھٹ جانے کی وجہ سے ہلاک ہوا تھا جبکہ ابراہیم حیدری پولیس نے اس کے دیگر ساتھی گرفتار کیے تھے۔