کراچی میں کالعدم تنظیم کا دہشتگرد گرفتار، اسلحہ اور بارودی مواد برآمد

کراچی(ڈیلی اردو) پاکستان رینجرز سندھ اور محکمہ انسداد دہشتگردی نے خفیہ اطلاع پر مشترکہ کارروائی کرتے ہوئے جیکب لائن، جمشید ٹاؤن سے ایک مبینہ دہشتگرد کو گرفتار کرنے کا دعویٰ کیا ہے۔

رینجرز ترجمان کے مطابق گرفتار ملزم کی شناخت شہزاد عرف ڈنگر کے نام سے ہوئی ہے۔ حکام کا کہنا ہے کہ ملزم کا تعلق منصور گروپ سے بتایا جاتا ہے، جبکہ کارروائی کے دوران اس کے قبضے سے اسلحہ اور بارودی مواد بھی برآمد کیا گیا۔

حکام کے مطابق ملزم کو کراچی میں کالعدم تنظیم کے لیے مبینہ طور پر مالی معاونت جمع کرنے کی ذمہ داری دی گئی تھی۔ وہ مختلف افراد سے ماہانہ بنیادوں پر رقوم اکٹھی کرکے مبینہ طور پر ایزی پیسہ اکاؤنٹس کے ذریعے وزیرستان منتقل کرتا رہا، جہاں یہ رقم دہشتگردی کی کارروائیوں میں استعمال کیے جانے کا دعویٰ کیا گیا ہے۔

رینجرز کے مطابق شہزاد مبینہ طور پر وزیرستان جا کر منصور سے خفیہ ملاقاتیں بھی کرتا رہا۔ حکام کا کہنا ہے کہ جون 2026 میں بیرمل میں ہونے والی ایک ملاقات کے دوران اسے دہشتگردی اور بھتہ وصولی کے لیے نیٹ ورک کو مزید فعال بنانے کی ہدایت دی گئی۔

ترجمان کے مطابق بعد ازاں ایک نامعلوم ساتھی کے ذریعے گرفتار ملزم کو اسلحہ اور بارودی مواد فراہم کیا گیا۔ حکام کا دعویٰ ہے کہ ملزم اور اس کے ساتھی حساس مقامات کو نشانہ بنانے کی منصوبہ بندی کر رہے تھے۔

پولیس اور رینجرز نے گرفتار ملزم سے مزید تفتیش شروع کردی ہے، جبکہ اس کے مبینہ ساتھیوں اور نیٹ ورک سے وابستہ دیگر افراد کی گرفتاری کے لیے مختلف مقامات پر کارروائیاں جاری ہیں۔