کراچی: کاؤنٹر ٹیررازم ڈیپارٹمنٹ پر سائبر حملہ

کراچی (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) سندھ کا خصوصی شعبہ سائبر دہشت گردی کا شکار ہوا ہے جس کی ای میل آئی ڈی ہیک کر کے حساس ڈیٹا منگوائے جانے کی بڑی سائبر وارداتیں سامنے آئی ہیں۔

سیکیورٹی ذرائع کے مطابق یہ واقعہ گزشتہ ماہ کا ہے تاہم اب صورتِ حال معمول پر آ چکی ہے۔

ذرائع کے مطابق ہیکرز نے سی ٹی ڈی کے غیر سرکاری ای میل اکاؤنٹ کے ذریعے ناصرف کئی موبائل کالز کا ڈیٹا ریکارڈ بلکہ ای میل اکاؤنٹ میں موجود سینکڑوں ای میلز کے ڈیٹا تک بھی رسائی حاصل کر لی ہے۔

ذرائع کے مطابق اس ضمن میں اعلیٰ سطح کی انکوائری جاری ہے، ہیک ہوئے ای میل اکاؤنٹ سے اہم ڈیٹا تک رسائی روک دی گئی ہے۔

کال ڈیٹا اور سی آر او سمیت اہم ڈیٹا سینئر افسران کے حکم سے مشروط کر دیا گیا ہے۔

ای میل ہیک ہونے کی تحقیقات میں حساس اداروں سے بھی معاونت لی گئی ہے۔

ذرائع کے مطابق ای میل آئی ڈی ہیک کرنے اور کئی روز تک اسے استعمال کرنے میں ملوث آئی پی ایڈریس پاکستان کا نہیں ہے، یہ کارروائی یورپی ملک سے کی گئی تھی۔

ذرائع کے مطابق تحقیقات کے دوران سی ٹی ڈی کے تمام سسٹم بند رکھے گئے تھے، جبکہ ہیک کی گئی گوگل اکاؤنٹ کی ای میل آئی ڈی فوری بند کر دی گئی تھی۔

ابتدائی طور پر اس معاملے میں ادارے کے اندرونی عناصر کے ملوث ہونے کے شواہد نہیں ملے۔

سی ٹی ڈی کے آئی ٹی سسٹم کو اب انتہائی طور پر محفوظ بنا دیا گیا ہے۔

دوسری جانب اس سلسلے میں رابطہ کرنے پر سی ٹی ڈی کے ڈپٹی انسپکٹر جنرل نے لاعلمی کا اظہار کیا ہے۔