کراچی: ‌فائرنگ کے 3 واقعات میں‌ 7 افراد ہلاک

کراچی (ڈیلی اردو) کراچی میں فائرنگ کے تین واقعات میں 7 افراد ہلاک ہوگئے جن میں‌ ٹک ٹاکر لڑکی مسکان بھی شامل ہیں۔

پولیس کے مطابق ملزمان نے گاڑی کا تعاقب کر کے اسے روکا اور چاروں افراد کو باہر نکال کر فائرنگ کا نشانہ بنایا جس سے لڑکی موقع پر ہلاک جبکہ تین لڑکے ہسپتال میں دم توڑ گئے، ہلاک لڑکی کی مسکان کے نام سے شناخت ہوئی ہے جس کی فائرنگ واقعہ سے پہلے بنائی گئی ٹک ٹاک ویڈیو بھی منظر عام پر آئی ہے، واقعہ میں نائن ایم ایم پستول کا استعمال کیا گیا، پولیس نے شواہد جمع کر کے مزید تفتیش شروع کر دی ہے۔

دوسری طرف کلفٹن بوٹ بیسن کے قریب نامعلوم افراد نے تعاقب کے بعد فائرنگ کرکے خاتون عینی اور عدنان کو قتل کردیا۔ مقتول عدنان ہجرت کالونی کا رہائشی اور نجی ریسٹورنٹ کا ملازم تھا۔

پولیس کے مطابق ابتدائی طور پر واقعہ غیرت کے نام پر قتل کا بتایا جارہا ہے، واقعے کا مقدمہ درج کر لیا۔ عدنان کی میت تدفین کیلئے آبائی علاقے روانہ کردی گئی۔

کچھ دیر قبل ایف آر پشاور سے تعلق رکھنے والے قبائل تحفظ موومنٹ کراچی کے صدر محمد ادریس آفریدی کے بھائی صدام آفریدی کو نامعلوم افراد نے فائرنگ کر کے ہلاک کر دیا۔