کرم: پاراچنار میں نامعلوم افراد کی فائرنگ، ایک شخص ہلاک، دوسرا زخمی

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے صدر مقام پاراچنار میں نامعلوم افراد کی فائرنگ سے ایک شخص ہلاک جبکہ دوسرا زخمی ہو گیا۔

پولیس کے مطابق پاراچنار کے علاقے شلوزان تنگی میں ریت لانے والے مزدور اور ٹریکٹر ڈرائیور پر نامعلوم افراد نے فائرنگ کی جس سے ایک شخص موقع پر ہلاک ہو گیا جبکہ فائرنگ کی زد میں آ کر دوسرا شخص زخمی ہو گیا۔

پولیس کا اس حوالے سے مزید کہنا ہے کہ زخمی اور لاش کو ڈسٹرکٹ ہیڈ کوارٹر ہسپتال پاراچنار منتقل کردیا گیا ہے۔
ڈسٹرکٹ ہیڈ کوارٹر ہسپتال کے ڈی ایم ایس قیصر عباس بنگش نے بتایا کہ ہلاک ہونے والےشخص کی شناخت ارشد حسین ولد حسین اکبر کے نام سے ہوئی ہے جن کی لاش پوسٹ مارٹم کے بعد ورثا کے حوالے کردی گئی ہے جبکہ زخمی شخص جس کا نام عمران ہے اور اس کا علاج جاری ہے ۔ جبکہ واقعہ کی تحقیقات کا سلسلہ جاری ہے۔

دوسری جانب طوری بنگش قبائل کے رہنماؤں عنایت حسین طوری، سید تجمل حسین اور آغا مزمل حسین نے فائرنگ کے واقعے کی شدید الفاظ میں مذمت کی اور حکومت سے ملوث افراد کی فوری گرفتاری کا مطالبہ کیا۔ انہوں نے کہا کہ سانحہ تری منگل کے ملزمان کو اگر بروقت گرفتار کرکے سزا دی جاتی تو اس قسم کے واقعات رونما نہ ہوتے۔