کرک: نیو کڑپہ میں پولیس پارٹی پر دہشتگردوں کی فائرنگ، ایس ایچ او اور گنر ہلاک

کرک (ڈیلی اردو) خیبرپختونخواہ کے شورش زدہ ضلع کرک کے علاقے نیو کڑپہ میں بانڈہ داؤد شاہ پولیس کی پارٹی پر دہشتگردوں نے اچانک فائرنگ کردی، جس کے نتیجے میں ایس ایچ او داؤد خان اور پولیس گنر فرہاد ہلاک ہوگئے۔

پولیس کے مطابق اہلکار معمول کی ڈیوٹی پر موجود تھے کہ دہشتگردوں نے اچانک فائرنگ کا نشانہ بنایا۔ فائرنگ کے بعد دہشتگرد موقع سے فرار ہوگئے۔

واقعے کی اطلاع ملتے ہی ڈی پی او کرک عمران خان بھاری نفری کے ہمراہ موقع پر پہنچ گئے اور جائے وقوعہ کا جائزہ لیا۔ پولیس نے دہشتگردوں کی تلاش اور گرفتاری کے لیے علاقے میں سرچ آپریشن شروع کردیا، جبکہ مختلف مقامات پر ناکہ بندی کرکے داخلی و خارجی راستوں کی نگرانی بھی سخت کردی گئی ہے۔

پولیس حکام کا کہنا ہے کہ فرار ہونے والے دہشتگردوں کی تلاش جاری ہے، جبکہ واقعے سے متعلق مزید تحقیقات بھی کی جارہی ہیں۔