کشمیر کی صورتحال پر وزیراعظم عمران خان کا فرانسیسی صدر اور شاہ اُردن کو ٹیلیفون

اسلام آباد (ویب ڈیسک) وزیراعظم عمران خان نے فرانس کے صدر ایمانوئل میکرون اور اردن کے بادشاہ عبداللہ ابن الحسن سے رابطہ کرکے کشمیر کی صورتحال سے آگاہ کیا۔

تفصیلات کے مطابق وزیراعظم عمران خان نے فرانس کے صدر ایمانوئل میکرون اور اردن کے بادشاہ عبداللہ ابن الحسین سے ٹیلیفونک رابطہ کیا اور مقبوضہ کشمیر کی صورتحال سے آگاہ کیا۔

وزیراعظم عمران خان نے دونوں رہنماؤں کو بتایا کہ بھارت کی مقبوضہ کشمیر میں غیر قانونی اور جارحانہ پالیسیوں نہ صرف سنگین انسانیت سوز بحران کا باعث ہے بلکہ خطے میں امن و سلامتی کو بھی خطرے میں ڈال دیا ہے۔

وزیراعظم کا کہنا تھا کہ بھارت متنازعہ علاقے کی ڈیموگرافی کو تبدیل کرنے کی کوشش کر رہا ہے، بھارت کا یہ عمل بین الاقوامی اصولوں اور اقوام متحدہ کی سلامتی کونسل کی قراردادوں کی صریح خلاف ورزی ہے، عالمی برادری کو بھارتی زیادتیوں کا نوٹس لینا چاہئے اور مقبوضہ کشمیر کے مظلوم عوام کے لئے آواز بلند کرنا ہوگی۔

اعلامیے کے مطابق فرینچ صدر ایمانوئل میکرون نے مسئلہ کشمیر کے پرامن حل کی ضرورت پر زوردیتے ہوئے کہا فرانس مقبوضہ کشمیر کی صورتحال کا قریب سے جائزہ لے رہا ہے۔ فرانس کے صدر نے افغان امن عمل میں پاکستان کے کردار کی تعریف کی۔

اردن کے بادشاہ عبداللہ ابن الحسن کا کہنا تھا کہ مقبوضہ کشمیر کی صورتحال کاجائزہ لے رہے ہیں، اردن کشمیر کی صورتحال پر دوسرے ممالک سے مشاورت کرے گا۔