کوہاٹ: غیرت کے نام پر بھائی نے بہن کو آشنا سمیت قتل کر دیا

کوہاٹ (ڈیلی اردو) خیبر پختونخوا کے ضلع کوہاٹ میں ایک شخص نے غیرت کے نام پر اپنی بہن اور ایک نوجوان کو قتل کردیا۔

پولیس کے مطابق بہزادی چکہ کوٹ کے علاقے نوری آباد میں ایک شخص نے اپنی بہن کو اس کے اپنے ہی گھر میں مبینہ طور پر آشنا کے ساتھ قابلِ اعتراض حالت میں دیکھ کر قتل کیا۔

جس کے بعد پولیس نے ملزم کو گرفتار کرلیا اور نعشیں خواتین اور بچوں کے ہسپتال منتقل کردی گئیں جو پوسٹ مارٹم مکمل ہونے کے بعد ان کے اہلِ خانہ کے حوالے کردی جائیں گی۔ وقوعے کا مقدمہ محمد ریاض شہید پولیس اسٹیشن میں درج کرلیا گیا۔

دوسری جانب کوہاٹ کے ہی علاقے سماری پیاں میں ایک خاتون کو پرانی دشمنی پر قتل کردیا گیا۔

لاچی پولیس اسٹیشن میں درج ایف آئی آر میں جہانزیب خان، طارق خان، اسحٰق خان اور نورشید خان کو نامزد کیا گیا جنہوں نے عابدہ بی بی نامی خاتون کے گھر میں گھس کر انہیں فائرنگ کر کے ہلاک کردیا۔ مذکورہ قتل پرانی دشمنی کا شاخسانہ قرار دیا جارہا ہے، لاچی پولیس اسٹیشن نے مقتولہ کی والدہ ممتاز کی مدعیت میں مقدمہ درج کیا۔

ملزمان جائے واردات سے فرار ہونے میں کامیاب ہوگئے تاہم پولیس نے ان کی تلاش میں چھاپہ مار کارروائی کا سلسلہ شروع کردیا ہے