ہنگو میں انٹیلیجنس آپریشن، ٹی ٹی پی کا مطلوب کمانڈر امیر معاویہ ہلاک

ہنگو (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع ہنگو میں سکیورٹی فورسز اور پولیس نے انٹیلیجنس بیسڈ آپریشن (آئی بی او) کے دوران کالعدم تحریک طالبان پاکستان (ٹی ٹی پی) کے مبینہ اہم کمانڈر احمد عرف امیر معاویہ کو ہلاک کرنے کا دعویٰ کیا ہے۔

سکیورٹی ذرائع کے مطابق کارروائی ضلع ہنگو کے علاقے چھپڑی نریاب میں خفیہ اطلاعات کی بنیاد پر کی گئی، جہاں 15 سے 18 مبینہ دہشت گردوں کی موجودگی کی اطلاع تھی۔ آپریشن کے دوران فائرنگ کے تبادلے میں احمد عرف امیر معاویہ ہلاک ہو گیا، جبکہ دیگر مسلح افراد فرار ہونے میں کامیاب ہوگئے، جن کی تلاش کے لیے علاقے میں سرچ آپریشن جاری ہے۔

حکام کے مطابق ہلاک ہونے والا مبینہ دہشت گرد خزینہ بانڈہ پولیس چیک پوسٹ پر ہونے والے حملے کا ماسٹر مائنڈ تھا اور کالعدم ٹی ٹی پی میں کمانڈر کاظم کے بعد اہم ذمہ داری کا حامل تھا۔ 

سکیورٹی اداروں کا کہنا ہے کہ وہ متعدد دہشت گردانہ کارروائیوں میں قانون نافذ کرنے والے اداروں کو مطلوب تھا۔

ذرائع کے مطابق احمد عرف امیر معاویہ گزشتہ روز سکیورٹی فورسز کے کواڈ کاپٹر ڈرون حملے میں زخمی ہوا تھا، جس کے بعد خفیہ اطلاعات پر کیے گئے انٹیلیجنس بیسڈ آپریشن میں اسے ہلاک کر دیا گیا۔

پولیس حکام نے بتایا کہ 29 جولائی کو ہنگو کے خزینہ بانڈہ پولیس چیک پوسسٹ پر دہشت گردوں نے حملہ کیا تھا، جس میں ایک ڈی ایس پی سمیت 10 پولیس اہلکار ہلاک جبکہ 28 دیگر زخمی ہوئے تھے۔ حکام کے مطابق حالیہ کارروائی اسی حملے میں ملوث عناصر کے خلاف جاری آپریشن کا حصہ ہے۔

سکیورٹی فورسز کے حکام کا کہنا ہے کہ خزینہ بانڈہ چیک پوسٹ حملے میں ملوث دیگر مبینہ دہشت گردوں کی تلاش اور ان کے خلاف کارروائیاں جاری ہیں، اور واقعے میں ملوث کسی بھی شخص کو قانون کی گرفت سے بچنے نہیں دیا جائے گا۔