ہنگو میں سکیورٹی فورسز کا آپریشن، 7 دہشت گرد ہلاک، کیپٹن حمزہ اکرم بھی ہلاک

راولپنڈی (ک م) پاکستان کے صوبہ خیبر پختونخوا کے ضلع ہنگو میں سکیورٹی فورسز کے انٹیلیجنس بیسڈ آپریشن میں 7 دہشت گرد ہلاک ہوگئے، جبکہ کارروائی کے دوران پاک فوج کے 27 سالہ کیپٹن حمزہ اکرم بھی ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق 7 اگست 2026 کو سکیورٹی فورسز نے ہنگو میں دہشت گردوں کی موجودگی کی اطلاع پر انٹیلیجنس بیسڈ آپریشن کیا۔

آئی ایس پی آر کے مطابق کارروائی کے دوران سکیورٹی فورسز نے دہشت گردوں کے ایک ٹھکانے کو نشانہ بنایا، جس کے بعد دہشت گرد ایک مسجد میں داخل ہوگئے۔

فوج کے بیان کے مطابق بعد ازاں سکیورٹی فورسز اور دہشت گردوں کے درمیان فائرنگ کا تبادلہ ہوا، جس میں 7 دہشت گرد ہلاک ہوگئے۔

آئی ایس پی آر نے بتایا کہ کارروائی کے دوران 27 سالہ کیپٹن حمزہ اکرم بھی ہلاک ہوگئے۔ کیپٹن حمزہ اکرم کا تعلق ضلع نارووال سے تھا اور وہ آپریشن کے دوران اپنے دستے کی قیادت کر رہے تھے۔

فوج کے مطابق ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔ ہلاک دہشت گرد سکیورٹی فورسز، قانون نافذ کرنے والے اداروں اور شہریوں کے خلاف مختلف دہشت گرد کارروائیوں میں ملوث تھے۔

آئی ایس پی آر کے مطابق علاقے میں کلیئرنس آپریشن جاری ہے تاکہ وہاں موجود دیگر دہشت گردوں کا سراغ لگا کر انہیں ہلاک یا گرفتار کیا جا سکے۔

ڈیلی اردو نے ایک روز قبل حملے کی خبر دی تھی

واضح رہے کہ ڈیلی اردو نے ایک روز قبل ہنگو میں سکیورٹی فورسز اور دہشت گردوں کے درمیان جھڑپ اور دہشت گردوں کی ہلاکتوں کی خبر سب سے پہلے دی تھی۔ 

ابتدائی اطلاعات کے مطابق جھڑپ ٹل-گرگری روڈ کے قریب ہوئی تھی۔

پاکستانی فوج نے آج باضابطہ طور پر کارروائی کی تصدیق کرتے ہوئے 7 دہشت گردوں کی ہلاکت اور کیپٹن حمزہ اکرم کے ہلاک ہونے کی تصدیق کردی ہے۔