یمن: الضالع میں سرکاری فوج کا ڈرون حملہ، 5 حوثی ہلاک، اسلحہ کا ذخیرہ تباہ

صنعاء(ڈیلی اردو) یمن کے جنوبی صوبے الضالع کے شہر دمت میں سرکاری فورسز کے ڈرون حملے کے نتیجے میں حوثی باغیوں کے 5 اہلکار ہلاک جبکہ متعدد زخمی ہوگئے۔

عسکری ذرائع کے مطابق ڈرون نے دمت شہر کے جنوبی داخلی راستے پر واقع الفردوس عمارت کو اس وقت نشانہ بنایا جب وہاں حوثی باغیوں کے متعدد ارکان موجود تھے۔

ذرائع کے مطابق حملے کے دوران عمارت میں موجود گولہ بارود کا ذخیرہ بھی تباہ ہوگیا، جس کے باعث حوثی باغیوں کو جانی نقصان کے ساتھ فوجی سازوسامان کا بھی نقصان اٹھانا پڑا۔

یہ کارروائی صوبہ الضالع کے مختلف محاذوں پر جاری کشیدگی کے دوران کی گئی ہے، جہاں حوثی باغیوں کی نقل و حرکت اور ان کے ٹھکانوں کو وقتاً فوقتاً نشانہ بنائے جانے کی اطلاعات سامنے آتی رہی ہیں۔