یمن میں حوثی باغیوں کی پیش قدمی روکنے کے لیے جنوبی العمالقہ فورسز کی کمک تعینات، صنعاء، تعز اور الجوف میں سعودی فضائی حملے

صنعاء(ڈیلی اردو) یمن کے صوبے لحج میں جنوبی العمالقہ فورسز نے حوثی باغیوں کی ممکنہ پیش قدمی روکنے کے لیے اپنی نفری اور کمک بڑھا دی ہے، جبکہ سعودی جنگی طیاروں نے صنعاء، تعز اور الجوف میں حوثی باغیوں کے ٹھکانوں کو نشانہ بنایا ہے۔ یمنی ذرائع کے مطابق لحج کے علاقے المضاربہ میں اضافی فورسز تعینات کی گئی ہیں تاکہ تعز کے ضلع الوازعیہ کی جانب سے الصبیحہ کے علاقوں میں حوثی باغیوں کی ممکنہ پیش قدمی کا مقابلہ کیا جاسکے۔

جنوبی العمالقہ فورسز نے اپنے بیان میں قبائل الصبیحہ کے لوگوں کی مزاحمت کو سراہتے ہوئے حوثی باغیوں کے خلاف لڑائی میں مشترکہ جدوجہد اور یکجہتی پر زور دیا۔ فورسز کے مطابق کمک بھیجنے کا مقصد علاقے میں دفاعی پوزیشن مضبوط بنانا اور حوثی باغیوں کی کسی بھی پیش قدمی کو روکنا ہے۔

دوسری جانب یمنی فوجی ذرائع کے مطابق صوبہ تعز میں گزشتہ 24 گھنٹوں کے دوران سعودی فضائی حملوں اور سرکاری فورسز کے ساتھ جھڑپوں میں درجنوں افراد ہلاک اور زخمی ہوئے، جن میں اکثریت حوثی باغیوں کی بتائی گئی ہے۔ ان جھڑپوں کے دوران تعز شہر کے گرد محاذ آرائی میں شدت آنے کی اطلاعات ہیں۔

ذرائع کا کہنا ہے کہ حوثی باغیوں نے ضلع المسراخ اور علاقے نجد قسیم پر قبضے کے بعد تعز شہر کا محاصرہ مزید سخت کردیا ہے۔ اس کے علاوہ وادی الضباب کے راستے پر بھی ان کی فائرنگ کے باعث دباؤ بڑھ گیا ہے، جو شہر کے جنوب مغربی حصے میں داخلے کا اہم راستہ سمجھا جاتا ہے۔

ادھر سعودی جنگی طیاروں کی جانب سے صنعاء، تعز اور الجوف میں حوثی باغیوں کے اہداف پر فضائی حملوں کی اطلاعات ہیں۔ ان حملوں میں ہونے والے جانی و مالی نقصان کی مکمل تفصیلات تاحال سامنے نہیں آئیں۔