یمن : حوثی ڈرون حملے میں ایک فوجی ہلاک، 2 زخمی، دوسرا ڈرون مار گرایا گیا

صنعاء (ڈیلی اردو) یمن کے صوبہ تعز میں حوثی باغیوں کے ڈرون حملے میں سرکاری فورسز کا ایک فوجی ہلاک جبکہ دو اہلکار زخمی ہوگئے۔ واقعے کے بعد اسی صوبے میں ایک اور حوثی ڈرون کو بھی مار گرایا گیا۔

عسکری ذرائع کے مطابق حوثی باغیوں نے جنوب مشرقی تعز میں حِیفان کے قریب قدس کے علاقے میں سرکاری فورسز کی ایک چوکی کو ڈرون کے ذریعے نشانہ بنایا۔ حملے کے نتیجے میں 35ویں آرمرڈ بریگیڈ کا ایک اہلکار ہلاک اور دو زخمی ہوئے، جنہیں طبی امداد کے لیے اسپتال منتقل کردیا گیا۔

دوسری جانب تعز ہی کے الصلو محاذ پر 35ویں آرمرڈ بریگیڈ کے اہلکاروں نے فضاء میں پرواز کرنے والے ایک حوثی ڈرون کو نشانہ بنا کر مار گرایا۔ عسکری ذرائع کا کہنا ہے کہ فورسز نے علاقے میں سکیورٹی الرٹ برقرار رکھا ہوا ہے اور حوثی باغیوں کی جانب سے فوجی مقامات کو نشانہ بنانے کی کسی بھی کوشش سے نمٹنے کے لیے تیار ہیں۔