یورینیم افزودگی سے پیچھے نہیں ہٹیں گے، ایرانی صدر پزشکیان

تہران (ڈیلی اردو) ایران کے صدر مسعود پزشکیان نے کہا ہے کہ تہران یورینیم افزودگی کے اپنے بنیادی حق سے کبھی دستبردار نہیں ہوگا، تاہم ایران جوہری ہتھیار بنانے کا کوئی ارادہ نہیں رکھتا۔

ایرانی سرکاری میڈیا کے مطابق اتوار کو تہران میں ایک تقریب سے خطاب کرتے ہوئے صدر پزشکیان نے کہا کہ رہبرِ اعلیٰ آیت اللہ علی خامنہ ای کا ہمیشہ سے یہی مؤقف رہا ہے کہ ایران ایٹمی ہتھیار نہیں بنانا چاہتا۔

انہوں نے کہا کہ امریکہ کا بنیادی مطالبہ یہ ہے کہ ایران جوہری بم تیار نہ کرے، اور ایران اس حوالے سے تحریری یقین دہانی بھی کرانے کے لیے تیار ہے۔

صدر پزشکیان نے کہا، “ہم اپنا یورینیم افزودگی کا حق ترک نہیں کریں گے، اور دوسرے فریق کے پاس بالآخر اس بنیادی حق کو تسلیم کرنے کے علاوہ کوئی چارہ نہیں ہوگا۔”

ان کا کہنا تھا کہ ایران کا پرامن جوہری پروگرام بین الاقوامی قوانین کے مطابق ہے اور ملک اپنی سائنسی و تکنیکی پیش رفت پر کوئی سمجھوتہ نہیں کرے گا۔

ایرانی صدر کا یہ بیان ایسے وقت میں سامنے آیا ہے جب امریکہ اور ایران کے وفود پاکستان اور قطر کی ثالثی میں سوئٹزرلینڈ میں مذاکرات کر رہے ہیں۔ ان مذاکرات میں ایران کے جوہری پروگرام، یورینیم افزودگی، افزودہ یورینیم کے ذخائر، علاقائی کشیدگی اور مفاہمتی یادداشت پر عمل درآمد سمیت مختلف اہم امور زیرِ بحث ہیں۔

تجزیہ کاروں کے مطابق یورینیم افزودگی کا معاملہ مذاکرات کا سب سے حساس نکتہ ہے، کیونکہ ایران اسے اپنا قانونی حق قرار دیتا ہے، جبکہ امریکہ اور اس کے اتحادی اس بات کو یقینی بنانا چاہتے ہیں کہ ایران جوہری ہتھیار حاصل نہ کر سکے۔