پنجاب میں سی ٹی ڈی کا انٹیلی جنس بیسڈ آپریشن، 9 دہشت گرد گرفتار

لاہور (بیورو رپورٹ)کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف شہروں میں انٹیلی جنس بیسڈ آپریشنز کرتے ہوئے 9 دہشت گردوں کو گرفتار کر لیا۔

ترجمان سی ٹی ڈی پنجاب کی جانب سے جاری بیان کے مطابق خفیہ اطلاعات کی بنیاد پر لاہور، فصیل آباد، گوجرانوالہ، بہالپور، بہاولنگر، سیالکوٹ اور حافظ آباد میں کارروائیاں کی گئیں۔

بیان میں بتایا گیا کہ کالعدم تحریک طالبان پاکستان (ٹی ٹی پی) کی مالی معاونت کرنے والے 2 اہم کارکنان کو لاہور سے گرفتار کرلیا گیا، دہشت گردوں کے قبضے سے 508 گرام بارودی مواد، 2 دستی بم، ایک آئی ای ڈی بم، کالعدم تنظیموں کے لٹریچر پر مبنی کتابیں، میگزین، پمفلٹس اور اسٹیکرز، ایک لاکھ 31 ہزار 830 نقدی نقدی اور 3 موبائل فونز برآمد ہوئے ہیں۔

سی ٹی ڈی کے ترجمان کے مطابق گرفتار دہشت گردوں میں عبدالرحمان، عبدالوحید، عظیم، زمان، سفیان، صدیق، سجاد جٹ، عمران علی اور عمر فاروق شامل شامل ہیں۔

سی ٹی ڈی کے ترجمان کا یہ بھی کہنا ہے کہ دہشت گرد مختلف شہروں میں حملوں کی منصوبہ بندی کر رہے تھے۔

مزید برآں اس دوران مقامی پولیس اور قانون نافذ کرنے والے اداروں کی مدد سے 314 کومبنگ آپریشنز کیے گئے، ِان کومبنگ آپریشنز کے دوران 12 ہزار 893 افراد کی چیکنگ کی گئی، 47 مشتبہ افراد کو گرفتار کیا گیا اور 48 ایف آئی آرز درج کی گئیں۔

یاد رہے کہ گزشتہ ماہ 11 نومبر کو سی ٹی ڈی پنجاب نے ایک بیان میں بتایا تھا کہ اس نے صوبے کے مختلف شہروں میں آپریشنز کے دوران کالعدم تنظیموں سے تعلق رکھنے والے 5 دہشت گردوں کو گرفتار کرلیا۔

ترجمان سی ٹی ڈی کے مطابق پاکپتن، راولپنڈی، بہاولپور اور ساہیوال میں خفیہ اطلاعات کی بنیاد پر 179 آپریشنز کیے گئے اور دہشت گردی کی ایک بڑی سازش کو ناکام بنا دیا گیا۔

یاد رہے کہ رواں برس 13 ستمبر کو بلوچستان کے محکمہ انسداد دہشت گردی (سی ٹی ڈی) نے کہا تھا کہ مستونگ میں ایک کارروائی کے دوران کالعدم تنظیم داعش کا کمانڈر مارا گیا۔

قبل ازیں 19 اگست کو 13 مبینہ دہشت گردوں کو سی ٹی ڈی نے گرفتار کیا تھا جن میں داعش کے اہم کمانڈرز شامل تھے۔

12 اگست کو کاؤنٹر ٹیررازم ڈیپارٹمنٹ (سی ٹی ڈی) پنجاب نے 21 ’دہشت گردوں‘ کو گرفتار کیا تھا، جس میں کالعدم داعش اور تحریک طالبان پاکستان کے دہشت گرد شامل تھے۔