افغانستان : غیرازدواجی تعلقات کا شبہ ، طالبان کی 2 افراد کو کوڑوں کی سزا

کابل (ڈیلی اردو) طالبان کی اعلیٰ عدالت نے کہا ہے کہ انہوں نے صوبہ بلخ میں دو افراد کو غیر ازدواجی تعلقات اور گھر سے فرار کے الزام میں سرعام کوڑے مارے ہیں۔

یہ سزا اتوار 12 جولائی کو دی گئی، اور طالبان کے سرکاری بیان کے مطابق، یہ کارروائی بلخ میں طالبان کے اعلیٰ حکام کی موجودگی میں انجام دی گئی۔

تاہم، طالبان کی جانب سے نہ سزا کی مدت بتائی گئی ہے اور نہ ہی یہ واضح کیا گیا ہے کہ دونوں افراد کو کتنے کوڑے مارے گئے۔

یاد رہے کہ طالبان اس سے پہلے بھی کابل اور غزنی میں کئی افراد کو اسی نوعیت کے الزامات پر کوڑے مارنے کی سزائیں دے چکے ہیں۔

طالبان نے اس بات پر زور دیا ہے کہ وہ شہریوں کے خلاف صحرائی (میدانی) عدالتوں کے ذریعے سزائیں دینے کا عمل جاری رکھیں گے۔