آبنائے ہرمز: ایرانی فورسز نے تین مال بردار بحری جہازوں پر حملے کیے

لندن (ڈیلی اردو/بی بی سی) بحری سلامتی کے ذرائع اور برطانوی فوج کی میری ٹائم سکیورٹی ایجنسی (یو کے ایم ٹی او) کے مطابق بدھ کے روز آبنائے ہرمز میں کم از کم تین کنٹینر بردار بحری جہازوں پر فائرنگ کی گئی۔

ایران نے اس آبنائے سے گزرنے والے جہازوں پر پابندیاں عائد کر رکھی ہیں۔ پہلے یہ اقدام امریکہ اور اسرائیل کی جانب سے ایران پر فضائی حملوں کے جواب میں کیا گیا، اور بعد میں ایرانی بندرگاہوں کی امریکی ناکہ بندی کے ردعمل میں بھی۔

ان حملوں میں سے ایک میں لائبیریا کے پرچم والے ایک کنٹینر شپ کے برج کو اس وقت نقصان پہنچا جب اسے عمان کے شمال مشرق میں فائرنگ اور راکٹ لانچر سے نشانہ بنایا گیا۔

یو کے ایم ٹی او کے مطابق اس جہاز کے کپتان نے اطلاع دی کہ ایرانی پاسداران انقلاب کی ایک گن بوٹ جہاز سے اس جہاز پر فائرنگ کی گئی۔ تمام عملہ محفوظ رہا اور اس واقعے سے نہ آگ لگی اور نہ ہی کوئی ماحولیاتی نقصان ہوا۔

یونان کی ایک کمپنی کے زیر انتظام اس کنٹینر شپ کے کپتان نے بھی بتایا کہ اس واقعے سے پہلے کوئی ریڈیو رابطہ نہیں کیا گیا تھا اور جہاز کو ابتدائی طور پر بتایا گیا تھا کہ اسے آبنائے ہرمز سے گزرنے کی اجازت ہے۔

بعد میں یو کے ایم ٹی او نے کہا کہ ایران کے مغرب میں تقریباً آٹھ بحری میل کے فاصلے پر ایک دوسرے کنٹینر شپ پر بھی فائرنگ کی گئی۔ پاناما کے پرچم کے ساتھ سفر کرنے والا یہ بحری جہاز کسی نقصان سے محفوظ رہا اور اس کا عملہ بھی محفوظ ہے۔

بحری سلامتی کے ذرائع کے مطابق ایک تیسرے کنٹینر شپ پر بھی ایران کے مغرب میں تقریباً آٹھ بحری میل کے فاصلے پر اس وقت فائرنگ کی گئی جب وہ آبنائے ہرمز سے باہر کی جانب جا رہا تھا۔ لائبیریا کے پرچم والا یہ جہاز اور اس کا عملہ دونوں ہی نقصان سے بچ گئے۔

اٹھائیس فروری کو ایران جنگ شروع ہونے سے پہلے تک اس سمندری راستے سے عام طور پر خام تیل اور قدرتی گیس کی عالمی برآمدات کے تقریباً پانچویں حصے کی ترسیل ہوتی تھی۔