آبنائے ہرمز سے گزرنے والی بحری آمدورفت پر کوئی رکاوٹ برداشت نہیں، برطانوی وزیرِاعظم

دوحہ (ڈیلی اردو) برطانیہ کے وزیرِاعظم کیئر اسٹارمر نے کہا ہے کہ آبنائے ہرمز سے بحری تجارت پر کسی بھی قسم کا محصول یا پابندی قابلِ قبول نہیں۔

قطر کے دورے کے آخری مرحلے میں گفتگو کرتے ہوئے انہوں نے بتایا کہ انہوں نے جمعرات کی رات امریکی صدر ڈونلڈ ٹرمپ سے بھی بات کی جس میں آبنائے ہرمز کے ذریعے بحری آمدورفت کی بحالی سے متعلق عملی اور لاجسٹک امور پر تبادلہ خیال کیا گیا۔

ان کے مطابق برطانیہ مختلف ممالک کے ساتھ مل کر ایک اتحاد تشکیل دے رہا ہے اور ایک سیاسی و سفارتی منصوبے پر کام کر رہا ہے، جبکہ اس کے ساتھ ساتھ اس بات کا بھی جائزہ لیا جا رہا ہے کہ تجارتی بحری جہازوں کو اس اہم آبی گزرگاہ سے محفوظ طریقے سے کیسے گزارا جائے۔

انہوں نے کہا کہ خطے کے رہنماؤں سے ملاقاتوں میں اس بات پر زور دیا گیا کہ آبنائے ہرمز میں تجارتی جہاز رانی پر نہ کوئی پابندی لگنی چاہیے اور نہ ہی کوئی اضافی چارجز عائد کیے جانے چاہییں۔

برطانوی وزیرِاعظم کے مطابق اس تنازع کے حل کے لیے خلیجی ممالک کی شمولیت ناگزیر ہے کیونکہ اس اہم سمندری راستے کے مستقبل پر ان کا مضبوط اور براہِ راست مؤقف ہے۔