آبنائے ہرمز میں جہازوں پر حملوں میں اضافہ، اکتوبر کے دوران 23 واقعات ریکارڈ

تہران (ڈیلی اردو) آبنائے ہرمز اور اس کے قریبی سمندری علاقوں میں تجارتی جہازوں پر حملوں کی رفتار میں تیزی آگئی ہے، جہاں اکتوبر کے آغاز سے اب تک 23 حملے رپورٹ ہوچکے ہیں۔ سمندری سکیورٹی سے متعلق اعداد و شمار کے مطابق یہ تعداد جنگ شروع ہونے کے بعد سے حملوں کی بلند ترین سطح کی عکاسی کرتی ہے۔

خبر رساں ادارے اے ایف پی کے مطابق اتوار کو کم از کم 6 جہازوں کو نشانہ بنایا گیا، جو ایک ہی دن میں حملوں کی سب سے بڑی تعداد ہے، جبکہ منگل کو مزید 4 جہازوں پر حملوں کی اطلاعات سامنے آئیں۔ تازہ واقعات کے دوران دو ملاح لاپتا ہونے کی بھی اطلاعات ہیں، جبکہ ایک کنٹینر بردار جہاز کے ڈوبنے کی خبر بھی سامنے آئی ہے۔

سمندری سکیورٹی کمپنی وینگارڈ، عالمی بحری تنظیم اور برطانوی میری ٹائم ٹریڈ آپریشنز کے اعداد و شمار کے مطابق اکتوبر میں رپورٹ ہونے والے 23 حملے جنگ کے آغاز سے اب تک کے ماہانہ اوسط سے تقریباً دوگنا ہیں۔ ان واقعات کے باعث خلیجی ممالک سے تیل اور دیگر تجارتی سامان کی ترسیل کے لیے اہم سمندری راستے پر جہاز رانی متاثر ہوئی ہے۔

وینگارڈ کے تجزیہ کار بارون گپتا کے مطابق حالیہ کشیدگی سے پہلے آبنائے ہرمز سے بحری آمدورفت جنگ سے قبل کی سطح کے تقریباً 80 فیصد تک بحال ہوگئی تھی اور تیل کی ترسیل میں بھی بہتری آرہی تھی، تاہم تازہ حملوں نے اس بحالی کو متاثر کیا ہے۔

رپورٹ کے مطابق ایران نے مارچ میں اپنی سرزمین پر امریکی اور اسرائیلی حملوں کے جواب میں اس سمندری راستے سے گزرنے والے تجارتی جہازوں کو نشانہ بنانا شروع کیا تھا۔ عالمی بحری تنظیم کے مطابق جنگ کے آغاز سے اب تک آبنائے ہرمز کے قریبی علاقے میں پیش آنے والے واقعات میں تقریباً 24 ملاح ہلاک ہوچکے ہیں۔