آبنائے ہرمز میں چینی آئل ٹینکر پر حملہ، بیجنگ کی تصدیق

بیجنگ (ڈیلی اردو) چینی وزارت خارجہ نے جمعہ آٹھ مئی کے روز اس امر کی تصدیق کر دی کہ چین کے ایک آئل ٹینکر کو رواں ہفتے آبنائے ہرمز میں ایک حملے کا نشانہ بنایا گیا۔

ساتھ ہی بیجنگ میں وزارت خارجہ نے اس بارے میں گہری تشویش کا اظہار بھی کیا کہ ایران جنگ کی وجہ سے پیدا شدہ بحرانی حالات سے آبنائے ہرمز سے گزرنے والے مال بردار بحری جہاز اور ان کے عملے کے ارکان بری طرح متاثر ہو رہے ہیں۔

وزارت خارجہ کے ترجمان نے صحافیوں کو بتایا کہ اس آئل ٹینکر پر تیل کی مصنوعات لدی ہوئی ہیں اور اس کے عملے کے ارکان بھی سب چینی شہری ہیں۔

قبل ازیں چینی میڈیا نے کل جمعرات کو اطلاع دی تھی کہ اس آئل ٹینکر کو رواں ہفتے پیر کے دن توانائی کی عالمی ترسیل کے لیے انتہائی اہم اس تنگ سمندری راستے میں حملے کا نشانہ بنایا گیا تھا۔

وزارت خارجہ کے ترجمان کے مطابق اس حملے میں آئل ٹینکر کے عملے کے ارکان میں سے کسی کو کوئی نقصان نہیں پہنچا تھا۔

میری ٹائم سکیورٹی اداروں کے بیانات کے مطابق اس بحری جہاز پر حملے کے بعد اس کے عرشے پر آگ لگ گئی تھی، جس کی اس سمندری خطے میں موجود دوسرے کارگو بحری جہازوں کے عملے کو احتیاطاﹰ اطلاع کر دی گئی تھی۔

چین پہلے کی طرح ایران جنگ شروع ہونے کے بعد بھی ایرانی تیل کا بڑا خریدار ہے اور آبنائے ہرمز کی ایران کی طرف سے تاحال بندش کے باوجود مارچ کے مہینے میں چین میں ایرانی تیل کی درآمدات پر تقریباﹰ کوئی منفی اثر نہیں پڑا تھا۔