آرمی چیف سید عاصم منیر کا خیبر اور وادی تیراہ کا دورہ

راولپنڈی (کاشف محمود) آرمی چیف جنرل سید عاصم منیر نے کور ہیڈ کوارٹرز پشاور، ضلع خیبر اور وادی تیراہ کا دورہ کیا جہاں انہوں نے پاک فوج کے جوانوں سے ملاقاتیں کی۔

پاکستانی فوج کے شعبہ تعلقات عامہ (آئی ایس پی آر) کے مطابق آرمی چیف نے قبائلی ضلع خیبر میں وادی تیراہ کا دورہ کرکے پاک افغان بارڈر پر اگلے مورچوں پر تعینات جوانوں کے ساتھ دن گزارا، فیلڈ کمانڈر نے جنرل عاصم کو مغربی بارڈرز مینجمنٹ اور آپریشنل تیاریوں سمیت بارڈر کنٹرول اقدامات بارے میں بریفنگ دی۔

انٹر سروسز پبلک ریلیشنز کے مطابق افسران اور جوانوں سے بات چیت کرتے ہوئے آرمی چیف نے فرض کی ادائیگی کے لئے جوانوں کے بلند حوصلے اور آپریشنل تیاریوں کی تعریف کرتے ہوئے کہا کہ قبائلی عوام اور سکیورٹی فورسز کی بے شمار قربانیوں سے ریاست کی رٹ قائم ہوئی۔

آئی ایس پی آر کے مطابق آرمی چیف نے اس عزم کا اعادہ کیا کہ قوم کے تعاون سے دہشت گردی کے خلاف جنگ جاری رہے گی اور پائیدار امن اور استحکام یقینی بنایا جائے گا۔

پاکستانی فوج کے شعبہ تعلقات عامہ کے مطابق جنرل عاصم منیر کا کہنا تھا کہ مادر وطن کا دفاع ہر قیمت پر یقینی بنایا جائے گا اور بے شمار قربانیوں سے حاصل امن خراب کرنے کی کسی کو اجازت نہیں دی جائے گی۔

آرمی چیف نے واضح کیا کہ دہشت گردی کے خلاف جنگ میں حاصل کردہ کامیابیوں کو رائیگاں نہیں ہونے دیں گے۔

آئی ایس پی آر نے بتایا کہ جنرل عاصم منیر نے بعد ازاں کور ہیڈ کوارٹرز پشاور کا بھی دورہ کیا اور یادگار شہداء پر حاضری دے کر پھولوں کی چادر چڑھائی، آرمی چیف کو آپریشنل، تربیتی اور فارمیشن کے دیگر امورکے بارے میں بھی بریفنگ دی گئی۔

آرمی چیف کی آمد پر کور کمانڈر پشاور لیفٹیننٹ جنرل حسن اظہر حیات نے استقبال کیا۔