آسٹریلیا اور پاکستان کے درمیان JF-17 تھنڈر بلاک 3 طیاروں کیلئے ایم او یو پر دستخط

اسلام آباد / کینبرا (ڈیلی اردو)  سٹریلوی حکومت نے پاکستان کے ساتھ JF-17 تھنڈر بلاک 3 ملٹی رول لڑاکا طیاروں کے حصول کے لیے مفاہمت کی یادداشت (ایم او یو) پر دستخط کرنے کی تصدیق کر دی ہے۔ دفاعی تجزیہ کار اس پیش رفت کو حالیہ برسوں کی سب سے غیر متوقع اور اہم دفاعی خریداریوں میں سے ایک قرار دے رہے ہیں۔

ذرائع کے مطابق یہ اقدام رائل آسٹریلین ایئر فورس (RAAF) کی جانب سے اپنے فضائی جنگی بیڑے کو متنوع بنانے کی حکمتِ عملی کا حصہ ہے، جہاں اس وقت امریکی ساختہ F-35A لائٹننگ II اور F/A-18F سپر ہارنیٹ جیسے جدید پلیٹ فارمز کو مرکزی حیثیت حاصل ہے۔

اگرچہ معاہدے کے تحت طیاروں کی حتمی تعداد اور مالی تفصیلات ابھی طے ہونا باقی ہیں، تاہم اسلام آباد میں ہونے والے مذاکرات سے باخبر ذرائع کا کہنا ہے کہ ابتدائی کھیپ کی فراہمی کے بعد آسٹریلیا مستقبل میں مزید JF-17 طیارے حاصل کرنے کا ارادہ رکھتا ہے۔

یہ ممکنہ دفاعی ڈیل JF-17 کے جدید ترین بلاک 3 ویریئنٹ پر مرکوز ہے، جسے ماہرین ’’4.5 پلس جنریشن‘‘ لڑاکا طیارہ قرار دیتے ہیں۔ بلاک 3 ورژن میں جدید ایکٹیو الیکٹرانک اسکیینڈ اری (AESA) ریڈار، ہیلمٹ ماونٹڈ ڈسپلے اینڈ سائٹ (HMD/S)، اور طویل فاصلے تک مار کرنے والے جدید PL-15E میزائلوں کو لے جانے کی صلاحیت شامل ہے۔

دفاعی حلقوں کے مطابق اس معاہدے کی تکمیل پاکستان کے لیے نہ صرف دفاعی سطح پر بلکہ معاشی اعتبار سے بھی ایک بڑی کامیابی ثابت ہو سکتی ہے۔ ماہرین کا کہنا ہے کہ اس سے پاکستان کے دفاعی سازوسامان کی برآمدات میں اضافہ ہوگا، دوست ممالک کے فوجی افسران کی پاکستان میں تربیت کے مواقع بڑھیں گے، جبکہ پاکستانی مسلح افواج کے تربیتی ماہرین کی بیرونِ ملک مانگ میں بھی نمایاں اضافہ متوقع ہے۔

اقتصادی تجزیہ کاروں کے مطابق ایسی دفاعی برآمدات پاکستان کے زرمبادلہ کے ذخائر کو مستحکم کرنے میں اہم کردار ادا کر سکتی ہیں اور ملکی دفاعی صنعت کو عالمی سطح پر نئی پہچان دلانے کا باعث بنیں گی۔