اسرائیل پوری دنیا کیلئے خطرہ بن چکا ہے، ترک صدر ایردوآن

انقرہ (ڈیلی اردو/ بی بی سی) ترکی کے صدر رجب طیب ایردوآن نے بدھ کے روز عالمی طاقتوں پر زور دیا کہ وہ اسرائیل کے خلاف زیادہ واضح مؤقف اختیار کریں، اور کہا کہ اسرائیل کو ’’عالمی برادری کی خاموشی‘‘ کی وجہ سے حوصلہ ملا ہے۔

ترک صدر نے بدھ کے روز کہا کہ اسرائیل کے شام اور لبنان پر حملے  اس حد تک پہنچ گئے ہیں کہ اب وہ ترکی کے لیے بھی خطرہ بن رہے ہیں۔ انہوں نے مزید کہا کہ اسرائیل کی ’’جارحیت‘‘ پوری دنیا کے لیے خطرہ ہے اور اسے فوری طور پر روکنا ضروری ہے۔

نیٹو کے رکن ملک ترکی کے صدر، ایردوآن نے اسرائیل کی ایران، غزہ اور لبنان میں کارروائیوں پر سخت تنقید کی اور کہا کہ اسرائیل خطے میں امن کی راہ میں سب سے بڑی رکاوٹ ہے۔ 

ترکی پہلے ہی اسرائیل کے ساتھ تمام تجارتی تعلقات معطل کر چکا ہے اور عالمی عدالتوں میں اس کے خلاف اقدامات کا مطالبہ بھی کر رہا ہے۔

پارلیمنٹ میں اپنی جماعت اے کے پارٹی کے ارکان سے خطاب کرتے ہوئے ایردوآن  نے کہا کہ اسرائیلی وزیر اعظم بینجمن نیتن یاہو اور ان کے نیٹ ورک کی جانب سے لبنان اور شام پر حملوں نے صورتحال کو اس نہج پر پہنچا دیا ہے جہاں یہ ترکی کے لیے بھی براہِ راست خطرہ بن چکی ہے۔ انہوں نے کہا کہ انقرہ کی  سکیورٹی شام اور لبنان کی سکیورٹی سے جڑی ہوئی ہے۔

ایردوآن نے الزام لگایا کہ اسرائیل افریقی ممالک اور بحیرۂ روم کے خطے کو غیر مستحکم کرنے کے لیے خفیہ کوششیں کر رہا ہے، اور قبرص جیسے نسلی تقسیم کے شکار جزیرے میں اختلافات کو ہوا دے رہا ہے۔

ایردوآن نے خبردار کرتے ہوئے کہا، ’’کسی کو بھی مہم جوئی کے پیچھے نہیں بھاگنا چاہیے۔ میں سب کو خبردار کرنا چاہتا ہوں کہ اگر مشرقی بحیرۂ روم میں ترکی اور ترک قبرصیوں کے حقوق کی خلاف ورزی ہوئی تو ہمارا جواب بہت واضح اور بہت سخت ہو گا۔‘‘

ترکی، جو  ایران کا پڑوسی ملک ہے، کا کہنا ہے کہ امریکہ اور ایران کے درمیان جنگ کا آغاز اسرائیل کی ’’اشتعال انگیزیوں‘‘ کی وجہ سے ہوا۔