اسرائیلی بمباری سے صنعاء لرز اٹھا، 10 حوثی ہلاک، 90 سے زائد زخمی

صنعاء (ڈیلی ااردو/نیوز ایجنسیاں)  یمن کے حوثی باغیوں نے الزام لگایا ہے کہ جمعرات کو اسرائیل نے دارالحکومت صنعاء پر فضائی حملہ کیا ہے، جو صرف چار روز قبل ہونے والی شدید بمباری کے بعد ایک اور کارروائی ہے۔

حوثیوں کے ٹی وی چینل ’’المسیرہ‘‘ نے ’’اسرائیلی حملے‘‘ کی خبر نشر کی، تاہم مزید تفصیلات فراہم نہیں کی گئیں۔

اسرائیل نے پیر کے روز بھی صنعاء میں فضائی حملے کیے تھے جن میں صدارتی محل سمیت مبینہ فوجی مقامات کو نشانہ بنایا گیا۔ 

حوثی حکام کے مطابق ان حملوں میں 10 افراد ہلاک اور 90 سے زائد زخمی ہوئے تھے۔ یہ کارروائیاں حوثیوں کی جانب سے اسرائیل پر میزائل اور ڈرون حملوں کے جواب میں کی گئی تھیں۔

حوثیوں نے بدھ کو ایک اور میزائل حملے کی ذمہ داری قبول کی تھی، جسے اسرائیلی فوج نے ناکام بنانے کا دعویٰ کیا۔ حوثی گروپ غزہ جنگ کے آغاز سے اب تک اسرائیل پر متعدد میزائل و ڈرون حملے کر چکا ہے اور بحیرہ احمر و خلیج عدن میں اسرائیل سے منسلک جہازوں کو بھی نشانہ بناتا رہا ہے۔