اسرائیلی فضائی حملے: لبنان میں حزب اللہ کے ٹھکانوں پر بمباری

بیروت (ڈیلی اردو/روئٹرز) لبنان کے جنوبی حصے میں اسرائیلی فضائی حملوں کے نتیجے میں ایک شخص کی ہلاکت اور  سات دیگر کے زخمی ہونے کی اطلاع ہے۔ وزارت صحت کے مطابق ہلاک ہونے والا شخص شامی شہری تھا جبکہ زخمیوں میں دو خواتین بھی شامل ہیں۔

سرکاری خبر رساں ایجنسی (این این اے) کے مطابق مرنے والا شامی شہری اس گلی سے گزر رہا تھا، جہاں اسرائیلی حملہ کیا گیا۔ حملوں میں کئی بلڈوزر تباہ ہوئے، جن میں آگ بھڑک اٹھی۔ 

عینی شاہدین نے کم از کم 15 فضائی حملوں کی اطلاع دی۔

اسرائیلی فوج نے دعویٰ کیا کہ اس نے حزب اللہ کے بنیادی ڈھانچے کو نشانہ بنایا، جس میں وہ سہولیات شامل تھیں، جن کی مبینہ طور پر  تعمیر نو کی جا رہی تھی۔ حزب اللہ نے فوری طور پر کوئی ردعمل ظاہر نہیں کیا۔

لبنانی صدر جوزف عون نے ان حملوں کی شدید مذمت کرتے ہوئے کہا کہ لبنان میں جنگ بندی کا نفاذ ضروری ہے، جیسا کہ غزہ میں کیا گیا ہے۔

عون نے ایکس پر ایک پوسٹ میں لکھا کہ اس واقعہ سے سوال یہ اُٹھتا ہے کہ کیا لبنان میں ہونے والے حملوں کا مقصد غزہ میں حملوں کی ناکامی کی تلافی کرنا ہے۔ نومبر کے آخر سے اسرائیل اور حزب اللہ کے درمیان برائے نام جنگ بندی جاری ہے، تاہم دونوں فریق ایک دوسرے پر خلاف ورزیوں کا الزام لگاتے رہے ہیں۔

اسرائیل کا کہنا ہے کہ حزب اللہ جنوبی لبنان میں اپنی فوج کو دوبارہ کھڑا کرنے کی کوشش کر رہا ہے، اس وجہ سے اسرائیل ایرانی حمایت یافتہ اس ملیشیا پر تقریباً روزانہ بنیادوں پر حملے کر رہا ہے، جن کے سبب اکثر ہلاکتیں ہو رہی ہیں۔