اسلام آباد: امام بارگاہ خدیجۃ الکبریٰ خودکش حملہ کیس، ملزمان کے ریمانڈ میں 7 روز کی توسیع

اسلام آباد (ڈیلی اردو) اسلام آباد کی انسدادِ دہشت گردی عدالت نے شیعہ مسجد و  امام بارگاہ خدیجۃ الکبریٰ پر ہونے والے خودکش حملے کے مقدمے میں گرفتار دو ملزمان کے جسمانی ریمانڈ میں مزید سات روز کی توسیع کر دی۔

انسدادِ دہشت گردی عدالت کے جج ابوالحسنات ذوالقرنین نے کیس کی سماعت کی، جس دوران کاؤنٹر ٹیررازم ڈیپارٹمنٹ (سی ٹی ڈی) نے گرفتار ملزمان واصف اللہ اور محمد شفیق کو عدالت میں پیش کیا۔

سی ٹی ڈی نے عدالت سے ملزمان کے 10 روزہ جسمانی ریمانڈ کی استدعا کی، تاہم عدالت نے دونوں ملزمان کا مزید سات روزہ جسمانی ریمانڈ منظور کر لیا۔

تفتیشی افسر کے مطابق دونوں ملزمان کو سی ٹی ڈی مردان نے گرفتار کیا تھا، جبکہ اے ٹی سی مردان کی اجازت کے بعد اسلام آباد پولیس نے انہیں تحویل میں لیا۔

تفتیشی افسر نے عدالت کو بتایا کہ دورانِ تفتیش ملزمان نے حملے میں سہولت کاری کا اعتراف کیا ہے۔ ان کے مطابق ملزمان خودکش حملے کی منصوبہ بندی اور مالی معاونت میں ملوث رہے ہیں۔

انہوں نے مزید بتایا کہ ملزمان کے مالی لین دین کی جانچ کے لیے ورچوئل کرنسی انویسٹی گیشن سیل کو خط ارسال کیا گیا ہے، اور متعلقہ ریکارڈ موصول ہونے کے بعد مزید تفتیش کی جائے گی۔

یاد رہے کہ امام بارگاہ خدیجۃ الکبریٰ پر ہونے والے خودکش حملے کی ذمہ داری داعش نے قبول کرنے کا دعویٰ کیا تھا۔ تنظیم کی جانب سے جاری کردہ بیان میں شامی تنازع اور ایرانی حمایت یافتہ کالعدم تنظیم زینبیون بریگیڈ کا بھی حوالہ دیا گیا تھا۔