اسلام آباد اور راولپنڈی میں حساس مقامات پر اینٹی ڈرون سسٹمز نصب کرنے کی تیاری

اسلام آباد (ڈیلی اردو) پاکستان کے دارالحکومت اسلام آباد اور جڑواں شہر راولپنڈی میں حساس مقامات اور اہم سرکاری عمارتوں کی سیکیورٹی کو مزید مضبوط بنانے کے لیے اینٹی ڈرون سسٹمز اور جدید گنز نصب کرنے پر غور کیا جا رہا ہے۔

تفصیلات کے مطابق آر پی او خالد ہمدانی کی سربراہی میں ریجنل کوآرڈینیشن کمیٹی کا اہم اجلاس منعقد ہوا، جس میں حساس چینی منصوبوں، سرکاری تنصیبات اور رہائشی علاقوں کی حفاظت کے لیے جدید حفاظتی اقدامات پر تفصیلی غور کیا گیا۔ اجلاس میں ایس ایس پی آپریشن ملک طارق، ایس ایس پی انویسٹی گیشن ناصر علی اور دیگر افسران نے بھی شرکت کی۔

اجلاس میں فیصلہ کیا گیا کہ چینی ماہرین کی رہائش گاہوں، ان کے کام کرنے کے مقامات اور آمدورفت کے راستوں پر سیکیورٹی انتہائی سخت کی جائے گی، اور کسی بھی غیر متوقع واقعے کو روکنے کے لیے اینٹی ڈرون سسٹمز اور جدید گنز تعینات کیے جائیں گے۔

آر پی او خالد ہمدانی نے اسپیشل برانچ کو ہاؤسنگ سوسائٹیز، عملے اور پرائیویٹ سیکیورٹی گارڈز کا مکمل اور بلا تفریق آڈٹ کرنے کا حکم دیا، جس میں تمام سیکیورٹی گارڈز کی تصدیق لازمی ہوگی تاکہ کسی بھی ناخوشگوار واقعے کو بروقت روکا جا سکے۔

اجلاس میں تمام اسٹیک ہولڈرز پر زور دیا گیا کہ وہ سیکیورٹی خدشات کی نشاندہی اور معلومات کے تبادلے کو اپنی اجتماعی ذمہ داری سمجھیں، جبکہ اسپیشل برانچ کو ممکنہ خطرات کم کرنے کے لیے جامع سروے کرنے کا ٹاسک سونپا گیا ہے تاکہ سیکیورٹی یقینی بنائی جا سکے۔

یہ اقدامات ایسے وقت کیے جا رہے ہیں جب وفاقی دارالحکومت اور جڑواں شہر میں چینی منصوبوں کی سیکیورٹی اور شہری مقامات کی حفاظت کو اولین ترجیح دی جا رہی ہے، تاکہ کسی بھی قسم کے خطرات یا ممکنہ حملوں سے محفوظ رہنے کے لیے فول پروف انتظامات یقینی بنائے جا سکیں۔