امریکا نے ایران کے ایک ارب ڈالر مالیت کے کرپٹو اثاثے ضبط کر لیے، اسکاٹ بیسنٹ

واشنگٹن (ڈیلی اردو) امریکا نے ایران کے تقریباً ایک ارب ڈالر مالیت کے کرپٹو کرنسی اثاثے ضبط کرنے کا اعلان کیا ہے۔

امریکی وزیر خزانہ اسکاٹ بیسنٹ نے ریگن نیشنل اکنامک فورم سے خطاب کرتے ہوئے کہا کہ ایران کے خلاف یہ کارروائی صدر ڈونلڈ ٹرمپ کے دور میں شروع کی گئی معاشی مہم کا حصہ ہے۔

اسکاٹ بیسنٹ کے مطابق امریکا نے ایران سے منسلک تقریباً ایک ارب ڈالر مالیت کے کرپٹو اثاثے ضبط کیے ہیں۔

خطاب کے دوران امریکی وزیر خزانہ سے آبنائے ہرمز کی ناکہ بندی ختم کرنے سے متعلق سوال کیا گیا تو انہوں نے کہا کہ جو کچھ بھی ہٹایا جائے گا، وہ مرحلہ وار ہٹایا جائے گا۔

ایران کے ساتھ ممکنہ معاہدے سے متعلق سوال پر اسکاٹ بیسنٹ نے کہا کہ پہلی مرتبہ ایران نے جوہری معاملے پر بات چیت کے لیے آمادگی ظاہر کی ہے۔

انہوں نے مزید کہا کہ عمان نے آبنائے ہرمز پر ٹیکس نہ لگانے کی یقین دہانی کرائی ہے، تاہم اگر عمان ایران کی مدد کرتا ہے تو اس کے خلاف بھی پابندیوں کا سامنا کرنا پڑ سکتا ہے۔

دوسری جانب امریکی صدر ڈونلڈ ٹرمپ نے ایران کے ساتھ ممکنہ معاہدے کے حوالے سے کہا ہے کہ ایران کو اس بات پر متفق ہونا ہوگا کہ وہ کبھی جوہری ہتھیار حاصل نہیں کرے گا۔

ایرانی وزارت خارجہ کے ترجمان اسماعیل بقائی نے امریکی مؤقف کو مسترد کرتے ہوئے کہا کہ اب تک امریکا کے ساتھ کسی قسم کا معاہدہ نہیں ہوا اور ایران اپنے جوہری پروگرام پر کوئی مذاکرات نہیں کر رہا۔