امریکہ اور روس کے درمیان نیو اسٹارٹ معاہدہ ختم، نئی جوہری دوڑ کا خدشہ

واشنگٹن (ڈیلی اردو) دنیا کو جوہری ہتھیاروں کی نئی دوڑ کے بڑھتے ہوئے خطرے کا سامنا ہے، کیونکہ امریکہ اور روس کے درمیان جوہری ہتھیاروں کے کنٹرول کا آخری معاہدہ ’نیو اسٹارٹ‘ جمعرات کی نصف شب بغیر کسی توسیع کے ختم ہو گیا۔

یہ معاہدہ دونوں ایٹمی طاقتوں کے اسٹریٹجک جوہری ہتھیاروں پر حد مقرر کرتا تھا۔ اس کے خاتمے کے بعد اب امریکہ اور روس کے جوہری ہتھیاروں کی تعداد پر کوئی باضابطہ بین الاقوامی پابندی باقی نہیں رہی۔

اقوام متحدہ نے اس صورتحال کو عالمی امن اور سلامتی کے لیے نہایت تشویشناک قرار دیتے ہوئے خبردار کیا ہے کہ جوہری ہتھیاروں کے استعمال کا خطرہ کئی دہائیوں میں اپنی بلند ترین سطح پر پہنچ چکا ہے۔

روس نے کہا ہے کہ وہ ذمہ دارانہ رویہ اختیار کرے گا، تاہم اگر اس کی سلامتی کو خطرہ لاحق ہوا تو وہ ’’فیصلہ کن اقدامات‘‘ سے گریز نہیں کرے گا۔ 

دوسری جانب امریکہ نے معاہدے کی مدت ختم ہونے کے بعد اس کی شرائط پر عمل جاری رکھنے سے متعلق کوئی واضح اعلان نہیں کیا۔

سن 2010 میں دستخط ہونے والے نیو اسٹریٹجک آرمز ریڈکشن ٹریٹی (New START) کے تحت امریکہ اور روس دونوں کے لیے تعینات اسٹریٹجک جوہری وارہیڈز کی حد 1,550 مقرر کی گئی تھی۔

 یہ معاہدہ فروری 2011 میں نافذالعمل ہوا تھا۔

اقوام متحدہ کے مطابق یہ معاہدہ کسی نئے یا توسیعی سمجھوتے کے بغیر جمعرات کی نصف شب ختم ہو گیا۔

دستیاب اعداد و شمار کے مطابق اس وقت روس کے پاس تقریباً 3,000 جبکہ امریکہ کے پاس 2,200 جوہری ہتھیار موجود ہیں، جبکہ اس معاہدے کے تحت ان کی تعداد بالترتیب 1,650 اور 1,500 تک محدود کی جانی تھی۔

واضح رہے کہ اسٹریٹجک آرمز ریڈکشن ٹریٹی، جسے نیو اسٹارٹ بھی کہا جاتا ہے امریکا اور روس کے درمیان 2010 میں طے پایا تھا۔

 یہ معاہدہ ان چند اہم عالمی معاہدوں میں شامل تھا جن کا مقصد تباہ کن جوہری جنگ کو روکنا تھا۔