امریکی بحریہ نے ایرانی بندرگاہوں کو عملاﹰ بلاک کر دیا، صدر ٹرمپ

واشنگٹن (ڈیلی اردو/روئٹرز/اے پی/اے ایف پی/ڈی پی اے) امریکی صدر ڈونلڈ ٹرمپ نے کہا ہے کہ امریکی بحریہ کی طرف سے آبنائے ہرمز میں ایرانی بندرگاہوں کو عملاﹰ بلاک کر دیا گیا ہے اور امریکہ کے بحری جہازوں کے قریب آنے والے ایرانی نیوی کے جہازوں کو تباہ کر دیا جائے گا۔

واشنگٹن سے پیر 13 اپریل کو موصولہ رپورٹوں کے مطابق صدر ٹرمپ نے یہ اعلان کرتے ہوئے کہ آبنائے ہرمز کی بندش کے ان کے حکم کے بعد امریکی نیوی نے اب عملی طور پر اس سمندری علاقے میں ایرانی بندرگاہوں کو بلاک کر دیا ہے۔

ڈونلڈ ٹرمپ نے اپنے ٹروتھ سوشل نامی میڈیا نیٹ ورک پر ایک پوسٹ میں لکھا، ’’یہ بلاکنگ اب نافذ ہو گئی ہے اور اس دوران اگر ایران کے حملوں کے لیے استعمال ہونے والے کسی بھی بحری جہاز نے اس بلاکنگ کے ذرا سا بھی قریب جانے کی کوشش کی، تو اسے تباہ کر دیا جائے گا۔‘‘

صدر ٹرمپ نے اپنی پوسٹ میں لکھا، ’’وارننگ: اگر ان جہازوں نے ہمارے بلاکیڈ کے ذرا سا بھی قریب آنے کی کوئی کوشش کی، تو انہیں فوراﹰ تباہ کر دیا جائے گا۔‘‘

ساتھ ہی امریکی صدر نے مزید لکھا کہ ایران کی بحری طاقت کو تو پہلے ہی بری طرح تباہ کیا جا چکا ہے۔

انہوں نے لکھا کہ امریکی بحریہ اب آبنائے ہرمز میں بھی اسی طرح کا طریقہ کار اپنائے گی، جیسا سمندر میں منشیات کے اسمگلروں کی کشتیوں کو تباہ کرنے کے لیے اپنایا گیا تھا۔

اس سے صدر ٹرمپ کی مراد وہ فضائی حملے تھے، جو لاطینی امریکی ملک وینزویلا کے ساحلوں کے پاس سمندر میں منشیات کی مبینہ اسمگلنگ کے لیے استعمال ہونے والی کشتیوں کو تباہ کرنے کی خاطر کیے گئے تھے۔