امریکی صدر کا ایران پر حملے منسوخ کرنے کا اعلان، معاہدے پر دستخط کا عندیہ

واشنگٹن (ڈیلی اردو) امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جنگ کے معاملے پر ایک ’’بہترین معاہدہ‘‘ طے پا گیا ہے اور اب فریقین اس معاہدے کی دستاویزات کو حتمی شکل دینے کے مرحلے میں داخل ہو چکے ہیں۔

اوول آفس میں صحافیوں سے گفتگو کرتے ہوئے ٹرمپ نے کہا کہ ان کے خیال میں معاہدے کی دستاویزات آئندہ چند روز میں مکمل ہو جائیں گی اور ممکنہ طور پر یورپ میں اس پر دستخط کیے جائیں گے۔ ان کا کہنا تھا کہ یہ مشرقِ وسطیٰ میں امن کے لیے ایک اہم پیش رفت ہوگی۔

امریکی صدر نے کہا کہ ان کے لیے سب سے اہم بات یہ ہے کہ مجوزہ معاہدے کے تحت ایران کبھی بھی جوہری ہتھیار حاصل نہیں کر سکے گا۔ ان کے بقول معاہدے پر جلد دستخط ہونے والے ہیں اور اس کی دستاویزات تقریباً تیار ہیں۔

اس سے قبل ٹرمپ نے اپنے سوشل میڈیا پلیٹ فارم ’’ٹروتھ سوشل‘‘ پر ایک پوسٹ میں کہا تھا کہ مذاکرات اور ممکنہ معاہدے کی ایران کی اعلیٰ قیادت سے منظوری کے بعد انہوں نے ایران کے خلاف آج کے لیے طے شدہ فضائی حملے اور بمباری منسوخ کر دی ہے۔

ٹرمپ کے مطابق بات چیت کے حتمی نکات، خواہ وہ اصولی نوعیت کے ہوں یا تفصیلی، تمام متعلقہ فریقوں کی جانب سے منظور کر لیے گئے ہیں۔ 

انہوں نے دعویٰ کیا کہ اس عمل میں امریکہ، اسرائیل، سعودی عرب، متحدہ عرب امارات، قطر، ترکی، پاکستان، بحرین، کویت، اردن، مصر اور دیگر ممالک شامل ہیں۔

تاہم امریکی صدر نے واضح کیا کہ آبنائے ہرمز کی بحری ناکہ بندی اس وقت تک برقرار رہے گی جب تک معاہدہ باضابطہ طور پر حتمی شکل اختیار نہیں کر لیتا۔

اوول آفس میں گفتگو کے دوران ٹرمپ نے پاکستان کے وزیرِ اعظم شہباز شریف اور فیلڈ مارشل عاصم منیر کی بھی تعریف کی۔ انہوں نے کہا کہ وہ اسرائیل، قطر، متحدہ عرب امارات، سعودی عرب، بحرین، کویت اور دیگر ممالک کے رہنماؤں سے بات چیت کر چکے ہیں جبکہ ترکی کے صدر رجب طیب اردوان سے بھی رابطہ کریں گے۔

امریکی صدر کا کہنا تھا کہ ’’سب بہت خوش ہیں اور مشرقِ وسطیٰ بھی بہت خوش ہے۔‘‘

دوسری جانب ایران کی جانب سے ٹرمپ کے ان بیانات اور مبینہ معاہدے کے دعووں پر تاحال کوئی باضابطہ ردِعمل سامنے نہیں آیا ہے، جبکہ معاہدے کی تفصیلات بھی عوامی سطح پر جاری نہیں کی گئی ہیں۔