انڈونیشیا میں خودکش دھماکا، پولیس افسر ہلاک، 11 افراد زخمی

جکارتہ (ڈیلی اردو/ڈوئچے ویلے) پولیس اسٹیشن پر موٹر سائیکل سوار کے خودکش حملے میں ایک پولیس افسر ہلاک جبکہ گیارہ افراد زخمی ہوگئے۔ انڈونیشیا کی پارلیمان نے منگل کو شادی کے بغیر جنسی تعلق کو جرم قرار دیا تھا۔

انڈونیشیا کے جزیرے جاوا کے بانڈونگ شہر میں ایک پولیس اسٹیشن پر خودکش بم حملے میں ایک پولیس اہلکار ہلاک اور کم از کم 11 زخمی ہوگئے۔ پولیس نے حملہ آور کی شناخت ایک سزا یافتہ بم ساز اوردہشت گرد تنظیم کے رکن کے طور پر کی ہے۔ اس حملہ آور کا نام آگس سوجاتنو بتایا گیا ہے جبکہ اسے ابو مسلم کے نام سے بھی جانا جاتا تھا۔

مقامی پولیس سربراہ کے مطابق سوجاتنو بم بنانے اور دہشت گردوں کی مالی معاونت کرنے کے الزام پر چار سال قید کی سزا پوری کرنے کے بعد گزشتہ برس ہی رہا ہوا تھا۔ اس خودکش حملہ آور کا تعلق داعش سے متاثر ایک دہشت گرد تنظیم جماعت انشاروت دولہ سے بتایا جاتا ہے۔

اطلاعات کے مطابق شدت پسند تنظیم کا یہ رکن ملکی پارلیمان کی طرف سے منظور کیے گئے نئے ضابطہ فوجداری سے ناراض تھا۔

ضابطہ فوجداری سے ناراض

پولیس کے مطابق خود کش حملہ آور کے زیر استعمال موٹر سائیکل پر ایک تحریری نوٹ چسپاں کیا گیا تھا، جس پر لکھا تھا، ”ضابطہ فوجداری کافروں کا قانون ہے، آئیے اس شیطانی قانون کا نفاز کرنے والوں کے خلاف لڑتے ہیں۔‘‘

انڈونیشیا کی پارلیمان نے منگل کے روز ایک نئے ضابطہ فوجداری کی منظوری دی تھی، جس کے تحت شادی سے باہر جنسی تعلقات قائم کرنے کے ساتھ ساتھ صدر اور قومی اداروں کی تضحیک پر سزائیں مقرر کی گئی ہیں۔

انڈونیشیا میں دہشت گردی کا مسئلہ

انڈونیشیا میں 2002 میں سیاحت کے لیے مشہور جزیرے بالیپر ہونے والے بم دھماکوں کے بعد سے عسکریت پسندوں کے خلاف جنگ جاری ہے۔ اس دھماکے میں 202 افراد ہلاک ہوئے تھے۔ ہلاک شدگان میں زیادہ تر غیر ملکی سیاح تھے۔ تاہم حالیہ برسوں میں غیر ملکیوں کو نشانہ بنانے والے حملوں کی جگہ بڑے پیمانے پر حکومت، پولیس اور انسدادِ دہشت گردی کی فورسز اور عسکریت پسندوں کے مخالفین کو نشانہ بنانے والے حملوں نے لے لی ہے۔