انگور اڈہ: افغان سرحد سے مارٹر حملہ، پاکستانی شہری ہلاک

وانا (ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان کے سرحدی علاقے انگور اڈہ میں افغانستان کی جانب سے مارٹر گولہ فائر کیے جانے کے نتیجے میں ایک شہری ہلاک ہو گیا۔

ذرائع کے مطابق گاؤں پنج گونہ میں مارٹر گولہ گرنے سے عثمان ولد خبیب اللہ ہلاک ہوئے، جبکہ علاقے میں خوف و ہراس پھیل گیا۔

رپورٹس کے مطابق سرحد پار سے مسلسل سول آبادی کو نشانہ بنائے جانے پر مقامی افراد میں شدید تشویش پائی جا رہی ہے۔ علاقہ مکینوں نے واقعے کی مذمت کرتے ہوئے حکومت سے شہریوں کے تحفظ کے لیے فوری اور مؤثر اقدامات کا مطالبہ کیا ہے۔

سرکاری ذرائع کا کہنا ہے کہ سیکیورٹی فورسز نے اس جارحیت کے جواب میں بھرپور جوابی کارروائی کی ہے۔

یاد رہے کہ گزشتہ ہفتے بھی سرحد پار فائرنگ کے واقعات میں متعدد افراد زخمی ہوئے تھے، جس کے باعث علاقے میں کشیدگی برقرار ہے۔