ایران: موساد کیلئے جاسوسی کے الزام میں جوہری ملازم کو پھانسی دے دی گئی

تہران (ڈیلی اردو) ایران میں اسرائیلی خفیہ ایجنسی موساد کے لیے جاسوسی کے الزام میں جوہری ادارے کے ایک سابق ملازم کو پھانسی دے دی گئی۔

تفصیلات کے مطابق ایران میں بدھ کے روز ایک شخص کو سزائے موت دی گئی جس پر اسرائیلی انٹیلی جنس ایجنسی موساد سے روابط رکھنے کا الزام تھا۔

ایرانی عدلیہ نے اس سزا پر عمل درآمد کی تصدیق کرتے ہوئے بتایا کہ مجرم کو “فساد فی الارض” جیسے سنگین الزام میں مجرم قرار دیا گیا تھا۔

ایرانی عدلیہ کی ویب سائٹ میزان آن لائن کے مطابق مہدی فرید کو اسرائیلی خفیہ ایجنسی کے ساتھ وسیع تعاون کے جرم میں صبح پھانسی دی گئی، جب کہ مقدمے کی سماعت مکمل ہو چکی تھی اور حتمی فیصلے کی توثیق بھی ہو چکی تھی۔

ناروے میں قائم تنظیم ایران ہیومن رائٹس کے مطابق مہدی فرید کو 31 مئی 2023 کو گرفتار کیا گیا تھا۔ وہ ایران کی ایٹمی توانائی ایجنسی میں ملازم رہ چکا تھا۔

تنظیم کے مطابق ابتدائی طور پر اسے 10 سال قید کی سزا سنائی گئی تھی، تاہم بعد ازاں جولائی 2025 میں نئے ٹرائل کے بعد اسے اسرائیل کے لیے جاسوسی کے الزام میں سزائے موت سنائی گئی۔