ایران میں پاسداران انقلاب کی گاڑی پر خودکش حملہ، 22 اہلکار شہید، 20 زخمی

تہران (ڈیلی اردو) ایران میں پاسداران انقلاب  کی بس پر خود کش حملے کے نتیجے میں 22 اہلکار شہید اور 20 سے زائد زخمی ہوگئے۔

بین الاقوامی خبر رساں ادارے کے مطابق ایران کے صوبے سیستان بلوچستان میں خود کش بمبار نے زاہدان سے کیش جانے والی پاسداران انقلاب کی بس کو نشانہ بنایا، خود کش حملے میں 22 اہلکار شہید ہوگئے جب کہ 20 زخمی ہیں۔

ریسکیو اداروں نے امدادی کاموں کا آغاز کرتے ہوئے شہید اور زخمی ہونے والوں اہلکاروں کو قریبی اسپتال منتقل کیا جہاں زخمیوں کو طبی امداد فراہم کی جا رہی ہے۔ میڈیا رپورٹس کے مطابق متعدد اہلکاروں کی حالت نازک بتائی جا رہی ہے۔

خودکش حملے کی ذمہ داری دہشت گرد تنظیم جیش العدل نے قبول کرلی ہے ۔ جبکہ سیکیورٹی اہلکاروں نے علاقہ کا محاصرہ کر کے تلاشی کا عمل شروع کردیا ہے۔

واضح رہے کہ گزشہ برس دسمبر میں چاہ بہار میں خود کش دھماکے میں دو پولیس افسران سمیت 4 افراد شہید ہوگئے تھے جب کہ ماہ ستمبر میں ایک اور واقعے میں فوجی پریڈ پر حملہ کیا گیا جس میں 30 سے زائد افراد شہید ہوئے تھے۔