ایران نے جوہری ہتھیار نہ بنانے کی یقین دہانی کرا دی، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ کا کہنا ہے کہ ایران نے یہ یقین دہانی کرائی ہے کہ وہ جوہری ہتھیار تیار نہیں کرے گا۔ ٹرمپ کا یہ بیان ایسے وقت میں سامنے آیا ہے جب اطلاعات ہیں کہ واشنگٹن نے تہران کو اسخت شرائط پر مبنی ایک امن تجویز بھی ارسال کی ہے۔

ذرائع کے مطابق اس مجوزہ معاہدے میں کسی بھی قسم کی تبدیلی یا رد و بدل مشرق وسطیٰ میں جاری کشیدگی کے خاتمے اور آبنائے ہرمز کو بحری آمد و رفت کے لیے کھولنے کے عمل میں مزید تاخیر کا باعث بن سکتا ہے۔

نیویارک ٹائمز اور مشہور امریکی نیوز ویب سائٹ Axios سمیت بین الاقوامی میڈیا اداروں نے رپورٹ کیا ہے کہ ٹرمپ  انتظامیہ نے ایران کو ایک نیا اور نسبتاً زیادہ سخت فریم ورک بھیجا ہے، تاہم فوری طور پر  اس کی تفصیلات واضح نہیں ہوئیں۔

ٹرمپ کا کہنا ہے کہ کسی بھی حتمی معاہدے کے لیے ان کی اولین ترجیحات میں ایران کے جوہری پروگرام کو محدود کرنا اور آبنائے ہرمز میں عائد پابندیوں کو ختم کر کے عالمی تجارتی راستے کو بحال کرنا شامل ہیں۔

ٹرمپ نے ہفتے کی شب فاکس نیوز پر نشر ہونے والے ایک انٹرویو میں اپنی بہو لارا ٹرمپ کو بتایا، ’’میرے لیے سب سے اہم ضمانت یہ ہے کہ کوئی جوہری ہتھیار نہیں ہوں گے۔ انہوں نے اس پر اتفاق کیا ہے، اور یہ بہت دلچسپ بات تھی۔‘‘

ایران کا کہنا ہے کہ وہ اپنے جوہری پروگرام جیسے معاملات پر بامعنی مذاکرات شروع کرنے سے پہلے تقریباً 12 ارب ڈالر کے منجمد اثاثوں کی بحالی چاہتا ہے۔ ایرانی میڈیا کے مطابق، تہران نے ٹرمپ کے اس دعوے کو ’’بے بنیاد‘‘ قرار دیا ہے کہ اس کا افزودہ یورینیم ختم کر دیا جائے گا۔

مزید برآں، تہران نے اس بات پر بھی زور دیا ہے کہ جنگ کے خاتمے سے متعلق کسی بھی معاہدے میں لبنان  کو شامل کیا جائے، جہاں اب بھی جھڑپیں جاری ہیں۔ بیروت نے اسرائیل  پر الزام عائد کیا ہے کہ اس نے اپنی پیش قدمی کے دوران ’’زمین جلا دینے کی پالیسی‘‘ اختیار کی اور مزید فضائی حملے کیے، جن کے بارے میں اسرائیل کا دعویٰ ہے کہ وہ ایران کے حمایت یافتہ گروہ حزب اللہ کو نشانہ بنا رہا ہے۔

دوسری جانب، جہاں ٹرمپ اور امریکی حکام پہلے اس بات کا اشارہ دے رہے تھے کہ معاہدہ قریب ہے،  وہیں فاکس نیوز سے اپنے انٹرویو میں ٹرمپ نے ممکنہ فوجی کارروائی کا عندیہ بھی دیا۔

انہوں نے کہا، ’’مجھے کوئی جلدی نہیں ہے۔ ہم آہستہ آہستہ وہ حاصل کر رہے ہیں جو ہم چاہتے ہیں، اور اگر ہمیں اپنی مطلوبہ چیز نہ ملی تو پھر معاملہ کسی اور طریقے سے انجام تک پہنچے گا۔‘‘