ایران کے بیلسٹک میزائل حملے: ابوظہبی میں گیس پلانٹ بند

ابوظہبی (ڈیلی اردو) حکام نے بتایا کہ فضائی دفاعی اقدامات کے بعد ابوظہبی میں ایک گیس پلانٹ کو بند کر دیا گیا۔

اماراتی حکام کے مطابق فضا میں ناکارہ بنائے گئے ایک میزائل کا ملبہ حبشان گیس پلانٹ کے مقام پر گرا، جس کے بعد آگ لگ گئی اور حکام نے آپریشن عارضی طور پر معطل کر دیا۔

ابوظہبی میڈیا آفس نے سوشل میڈیا پر کہا، ’’ابوظہبی کے حکام حبشان گیس تنصیبات پر گرنے والے ملبے کے واقعے سے نمٹ رہے ہیں، جو فضائی دفاعی نظام کی کامیاب کارروائی کے بعد پیش آیا۔ آگ پر قابو پانے کے لیے کارروائی جاری ہے اور کسی جانی نقصان کی اطلاع نہیں ملی۔‘‘

حکام کے مطابق یہ بندش احتیاطی اقدام کے طور پر کی گئی ہے جبکہ ہنگامی ٹیمیں صورتحال پر قابو پانے کی کوشش کر رہی ہیں۔